Бүгін «17 қараша - Халықаралық студенттер» күніне орай, студент жастардың бойындағы шығармашылық қабілеттерін және білімге, өнерге деген құштарлығын арттыру мақсатында Сарыағаш аудандық “Жастар ресурстық орталығы” КММ-нің ұйымдастыруымен “Қызыққа толы студенттік өмір” атты аудандық фестивалі өтті.
Мерекелік шараға аудан әкімі Арман Абдуллаев, Президент жанындағы Ұлттық құрылтай мүшесі, «Дарын» жастар сыйлығының иегері, айтыскер ақын Біржан Байтуов және облыстық Жастар ресурстық орталығы басшысының орынбасары Пердебек Есқұлов қатысып, студенттерді арнайы құттықтады.
– Әр адамның өмірінде ерекше орын алатын студенттік шақ ешқашан ұмытылмайды. Бұл – қызығы мен қиындығы қатар жүретін, болашаққа бастар маңызды кезең. Сіздер бүгін жастықтың жарқын сәттерін бастан өткеріп, ертеңгі ересек өмірге сенімді қадамдар жасап жатырсыздар. Алдағы уақытта үлкен жетістіктерге жетіп, биіктерден көрінулеріңізге тілектеспін, – деді аудан әкімі өз құттықтауында.
Фестиваль бағдарламасы студенттердің IT саласындағы жетістіктері мен қолөнер бұйымдарының көрмесінен басталды. Кейін әр колледж өздерінің ерекше шығармашылық қойылымдары мен өнерлерін ұсынды.
Фестиваль қорытындысы бойынша жеңімпаздар анықталды:
• “Білімді ұрпақ” кезеңі бойынша – Қапланбек жоғары аграрлық техникалық колледжі І орын;
• “Менің колледжім” кезеңі бойынша – Абу Али Ибн Сина колледжі І орын;
• “Ұмытылмас студенттік шақ” кезеңі бойынша – Арыстанбаб жоғары колледжі І орын;
• Тақырыптық көрініс бойынша – Сарыағаш медресе колледжі І орын.
Барлық жеңімпаздар аудан әкімінің алғыс хаттарымен және бағалы сыйлықтармен марапатталды.
Айта кетсек, қазіргі уақытта Сарыағаш ауданындағы 6 арнаулы орта оқу орнында 5076 студент білім алуда, оның 1283-і жатақханамен қамтамасыз етілген. 2024 жылы 5 колледжге 1075 мемлекеттік грант бөлініп, студенттер тегін білім алу мүмкіндігіне ие болды.
