Бүгін Президент Қасым-Жомарт Тоқаев Ұлттық Банк төрағасы Тимур Сүлейменовті қабылдады, деп хабарлайды «Адырна» тілшісі Ақордаға сілтеме жасап.
Мемлекет басшысына Ұлттық банктің биылғы жартыжылдықта іске асырған ақша-несие саясатының қорытындысы туралы есеп берілді.
Тимур Сүлейменов Қазақстандағы және әлемдегі экономикалық жағдайдың даму барысы және инфляцияның қарқыны мен оны тұрақтандыру шаралары жөнінде баяндады. Сондай-ақ ол жылдық инфляцияның бәсеңдегенін және ішкі экономикада проинфляциялық факторлардың сақталып отырғанын айтты.
Төраға ұлттық төлем жүйесі мен ашық банкинг принциптерін дамыту және қазақстандықтардың қаржысын алаяқтардан қорғау үшін антифрод-орталық құру жобаларын жүзеге асыруға қатысты Мемлекет басшысы берген тапсырмалардың орындалу барысы туралы айтты.
Кездесу соңында Қасым-Жомарт Тоқаев Ұлттық Банктің қызметіне, соның ішінде инфляцияны одан әрі тұрақтандыру және цифрлық қаржылық инфрақұрылым жасау жөнінде бірқатар тапсырма берді.
