Ақордада су тасқынымен күреске белсене атсалысқан азаматтарды салтанатты түрде марапаттау рәсімі өткені хабарланды

668
Adyrna.kz Telegram

Мемлекет басшысы су тасқынымен күрескен азаматтарды марапаттады, деп хабарлайды “Адырна” ұлттық порталы Ақордаға сілтеп.

Президент Тоқаев су тасқыны бұрын соңды болмаған ең жойқын табиғи апат екенін атап өтті. Елімізде 19 мыңнан астам тұрғын үйді су басты.

“Сын сағатта еліміз ырысты ынтымағын танытты. Біз табиғи апат кезінде жұрт болып жұмылдық. Біртұтас ел екенімізді көрсеттік. Құтқарушылар, әскерилер, ішкі істер органдары мен әкімдік қызметкерлері тәулік бойы жұмыс істеді. Олар Отан алдындағы парызын мінсіз атқарды. Бір сөзбен, антқа адал болды”, – деді Мемлекет басшысы.

Мемлекет басшысы топан сумен күреске күштік құрылымдардың 63 мыңнан астам қызметкері атсалысқанына назар аударды. Апат кезінде 120 мыңнан астам адам, оның ішінде 40 мың бала қауіпсіз жерге көшірілген.

”Бұл – құтқарушылар мен ұшқыштардың қажырлы еңбегінің нәтижесі. Әбіш Кекілбаев «Елін сүйген азаматқа ең үлкен қайғы – өз халқының тағдырынан тыс қалу» деп айтқан. Ұлттық еріктілер желісі табиғи апат болған сәттен бастап ерекше белсенді болды. 50 мыңнан астам волонтер көмек керуендерін ұйымдастырды. Олар апат аймақтарына азық-түлік және басқа да қажетті заттарды жеткізуге атсалысты. Қазақстан халқы Ассамблеясының «Жүректен жүрекке» акциясы ортақ іске мол септігін тигізді”, – деді Президент.

Пікірлер