Ақтауда 19-ықшамауданның тұрғындары бірнеше күннен бері ауыз сусыз отыр, деп хабарлайды "Адырна" ұлттық порталы Lada басылымына сілтеп.
11 маусым күні тұрғындар пәтерлерінде судың жоқтығына наразылық білдіріп, жолды жауып тастады. Оқиға орнына полиция, қала әкімі мен коммуналдық қызмет өкілдері аттанды. Қала әкімдігінің баспасөз қызметі жағдайға қатысты түсініктеме берді.
"Екінші қабатта да су қысымы жетпейді. Тұрақты шағымдар мен уәделер нәтиже бермейді", - дейді халық.
Шарасызданған жергілікті тұрғындар мәселеге назар аудару үшін жолды жауып тастаған.
Маңғыстау облыстық полиция департаментінің қызметкерлері жолды тазалап, тұрғындарды жол жиегіне шығуды сұрады. Көлік қозғалысы қалпына келтірілді.
Халыққа қала әкімі Ұлықбек Тналиев пен ҚЖСА басшысы келген. Шенеуніктермен кездескен тұрғындар үйлеріне тарқасты.
