QR Prezıdenti Ákimshiliginiń Basshysy Aıbek Dádebaev respýblıkalyq telearnaǵa bergen suqbatynda memlekettik tilge qatysty suraqqa jaýap berdi.
«Ózderińiz bilesizder, elimizde kóptegen etnos ókilderi turady. Buǵan sebepker bolǵan tarıhı oqıǵalardy jaqsy bilesizder. Qazir til máselesin kúrdelendirip, tipti saıası oıynǵa aınaldyrǵysy keletinder de bar. Máselen, elimizde tilge qatysty jurtty daýryqtyryp, ult bolashaǵyna qaýip tóndiretin másele týdyryp júrgenderdi baıqaımyz. Bul - ulttyq qaýipsizdigimizge keri áser etetin jaıt. Qaı turǵydan qarasaq ta tildik másele názik, asa jaýapkershilikpen kelýdi talap etedi», - degen pikirin bildirdi Aıbek Dádebaev.
QR Prezıdent Ákimshiliginiń basshysy óz suqbatynda elde memlekettik tilge, onyń qoldaný aıasynyń keńeıýine aıryqsha mán beriletinine toqtaldy. Onyń aıtýynsha, bul – elimiz búgingi tańda júrgizip otyrǵan asa astary tereń saıasat.
«Naqty formýlasy – kóptildi qoǵam, jalǵyz memlekettik tili bar el! Iaǵnı, onyń mańyzdy komponenti – tildik tózimdilik, jańasha aıtsaq, tildik toleranttyq. «Jyly-jyly sóıleseń...» degen halyq naqyly qashanda jadymyzda bolǵany jón. Eldiń baıandy bolashaǵy degen qasterli iste qandaı másele bolsyn sabyrmen, aqylǵa salyp sheshetin bizdiń eldiń azamattary úshin bul qoldan keletin sharýa. Bizdiń aldyńǵy býynnyń da ósıet etkeni osy. Bile bilsek, tildik tózimdilik – qala berdi memlekettik, ıaǵnı eldik qaýipsizdigimizdiń kepili. Daýryqpa aıqaı, dál qazir ne qylsa da bola salsyn degen talap múldem burys nátıje ákelýi múmkin!», - dep sanaıdy Aıbek Dádebaev.
QR Prezıdenti Ákimshiliginiń Basshysy A. Dádebaev memlekettik tildiń qoldanys aıasynyń odan ary keńeıe berýin qamtamasyz etetinin jáne qazaq tili túbinde ultaralyq tilge aınalatynyn málimdedi.
