بۇگىن «اتامەكەن» ونەر ورتالىعىندا 7 مامىر – وتان قورعاۋشىلار كۇنىنە ارنالعان سالتاناتتى جيىن ءوتتى.
مەرەكەلىك شارادا وبلىس اكىمى ناريمان تورەعاليەۆ ەل دامۋىندا ەر ازاماتتاردىڭ ورنى مەن ەرلىگىن تىلگە تيەك ەتىپ، كەشەگى وڭىرىمىزدە ورىن العان سۋ تاسقىنى كەزىندە جاساعان ەڭبەكتەرىنە ەرەكشە توقتالدى.
«وبلىسىمىزدان جانە باسقا دا وڭىرلەردەن 3 مىڭعا جۋىق كۇشتىك قۇرىلىم قىزمەتكەرلەرىمەن قاتار، ەلدىڭ ناعىز پاتريوتتارى، ەلدىڭ بولاشاق قورعاندارى جاستار قاۋىمى قيىن ساتتە ۇيىمشىلدىق تانىتىپ، ەل ءۇشىن ايانبايتىندارىن دالەلدەدى. بۇدان بولەك، ەرىكتىلەر مەن قاراپايىم تۇرعىندارىمىز دا كۇندىز-ءتۇنى تاسقىن سۋعا قارسى جۇمىستارعا قول ۇشىن سوزدى.
ناتيجەسىندە، ۋاقىتىلى قابىلدانعان شارالاردىڭ ارقاسىندا ورال قالاسى مەن وبلىسىمىزدىڭ 4 اۋدانىندا ورنالاسقان 84 ەلدى مەكەنىن سۋ تاسقىنىنان امان الىپ قالدىق»، - دەدى ءوز قۇتتىقتاۋىندا وبلىس اكىمى.
شارا ماراپاتتاۋ راسىمىمەن جالعاسىپ، تاۋەلسىزدىگىمىز بەن تۇتاستىعىمىزدى، تىنىشتىعىمىز بەن بەيبىت تىرلىگىمىزدى كۇزەتىپ تۇرعان، حالقىمىزعا قورعان بولعان كۇشتىك قۇرىلىم قىزمەتكەرلەرى مەن سىني ساعاتتا قولداۋ بىلدىرگەن جاندار ماراپات تورىنەن كورىندى.
سالتاناتتى شارا جەرگىلىكتى ونەرپازداردىڭ كونتسەرتىنە ۇلاستى.
