Павлодарда шұңқырға түсіп кеткен автобусты іздеу жұмыстары жалғасып жатыр, деп хабарлайды "Адырна" тілшісі.
Жолаушыларды іздеу жұмыстары тәулік бойы жүргізіліп жатыр.
"Майқайың-алтын" АҚ тау-кен ауданындағы опырылған жерде іздестіру жұмыстарының қарқыны туралы Павлодар облысының әкімі Асайын Байханов мәлімдеді.
“Кеше опырылған жердің түбіне техниканы түсіру үшін өткел дайындау басталды. Бұл жұмыстарға 3 экскаватор, 2 тиегіш, 2 бульдозер жұмылдырылды. Жұмыстар тәулік бойы, үздіксіз жүргізілуде. 5 мың текше метрге жуық топырақ пен тау жыныстары қазылып, шығарылды”, - деп хабарлады басшы.
Іздеу жұмыстарына барлығы 134 адам, 37 бірлік техника, 3 кинологиялық есеп және 2 бірлік дрон жұмылдырылды.
Еске сала кетейік, 4 қаңтар күні сағат 01:25 шамасында Павлодар облысы Баянауыл ауданында, Майқайың кенішінің маңында төрт жолаушысы бар автобус шахта маңындағы шұңқырға құлап кеткен болатын.
