Өзбекстан президенті Шавкат Мирзиеев мажоритарлық сайлау жүйесінен - аралас пропорционалды сайлау жүйесіне көшу туралы конституциялық заңға қол қойды. Құжат «Халқ сузи» газетінде жарияланды, деп хабарлайды "Адырна" ұлттық порталы.
Осы уақытқа дейін Өзбекстанда мажоритарлық сайлау жүйесі қолданылған, онда өз округінде көпшілік дауыс алған кандидаттар сайланатын. Оның үстіне барлық кандидаттар елде әрекет ететін партиялардың атынан шығуы керек болды.
Пропорционалды жүйеде дауыс беру партиялық тізімдер бойынша өтеді, оның нәтижелері әр партия алған дауыстар санына пропорционалды мандаттарды бөлу принципімен анықталады.
Өзбекстанның Сайлау кодексіне жаңа заңмен енгізілген түзетулерге сәйкес, Парламенттің Заң шығару палатасының 75 депутаты мажоритарлық жүйе бойынша (кандидат үшін дауыс беру) бір мандатты округтер бойынша, ал қалған 75-і пропорционалдық жүйе бойынша саяси партиялар үшін берілген дауыстар негізінде (кандидаттардың тізіміне дауыс беру) сайланады.
Бұл ретте әйелдердің саны саяси партиядан бір мандатты сайлау округтері бойынша, сондай-ақ партиялық тізім бойынша депутаттыққа кандидаттар санының кемінде 40 пайызын құрауы тиіс. «Партиялық тізімдегі әрбір бес кандидаттың кем дегенде екеуі әйел болуы керек», - деп түсіндірді Әділет министрлігі.
Пропорционалдық жүйе бойынша сайланатын Заң шығару палатасы депутаттарының мандаттары 7 және одан да көп пайыз дауыс алған саяси партиялар арасында бөлінеді. Мұндай нәтижені бір ғана партия алса, онда ең көп дауыс жинаған екінші партияның кандидаттары депутат бола алады.
