Алматыда метрополитеннің үшінші кезегінің құрылысы аясында 2025 жылы «Қалқаман» метро станциясы салынады. Ол жолаушылар санын тәулігіне 20 мың адамға арттырады. Бұл туралы Алматы қаласы әкімінің орынбасары Асқар Әмрин айтты, деп хабарлайды «Адырна» тілшісі.
Әкімнің орынбасары 2030 жылға дейін «Барлық» базарына дейін тағы үш станция салу жоспарланып отырғанын атап өтті.
«Алдағы уақытта «Батыс» автовокзалы, LRT және метрополитен станциялары кіретін ірі мультимодальды көлік торабы құрылады. Ұзындығы 3,1 шақырым болатын «Сарыарқа» және «Бауыржан Момышұлы» станциялары іске қосылса да, күн сайын жолаушылар ағыны артуда»,—деді ол.
Сондай-ақ Асқар Әмрин бүгінде халықтың тығыздығын ескере отырып, көлік құрылымы әзірленіп жатқанын мәлім етті.
