Абай облысында "ҚазАвтоЖол" ұлттық компаниясының мамандары түні бойы қар құрсауында қалған жүргізушілерді құтқару жұмыстарын жүргізді. 60-тан астам автокөлік қардан шығарылғанымен, жолда қалғандар әлі де көп, деп хабарлайды "Адырна" ұлттық порталы.
Бораннан жол жабылды
12 наурыз күні сағат 23:00-де "Алматы – Талдықорған – Өскемен" тасжолының Таскескен ауылына бұрылыс пен Аягөз қаласы аралығында жүк көліктері үшін жол жабылған. Кейіннен боран күшейіп, жеңіл көліктердің қозғалысына да шектеу қойылды. Алайда, 100-ден астам көлік жолға шығып үлгеріп, қар құрсауында қалды.
Құтқару жұмыстары жүргізілуде
"ҚазАвтоЖол" компаниясының 20-ға жуық арнайы техникасы қар тазалау жұмыстарын жалғастыруда. Бірақ боран күшейіп, жолды тазалауға кедергі келтіруде. Жолда қалған 3 жолаушы автобусы Аягөзге жеткізіліп, 77 адам (оның ішінде 3 бала) жылыту пунктіне орналастырылды.
Таскескен – Аягөз бағыты әлі жабық
Қазіргі уақытта Таскескен жағында – 90 жүк көлігі, 40 жеңіл көлік және 4 автобус жолдың ашылуын күтіп тұр. Аягөз жағында – 120-дан астам көлік жолдың ашылуын тосуда.
Мамандар ескерту жасайды
Көктем басталғанымен, қыс әлі де өз мінезін көрсетуде. Осыған байланысты мамандар жүргізушілерге жолға шықпас бұрын 1403 байланыс орталығына хабарласып, жолдың ашықтығы туралы ақпарат алуға кеңес береді.
