Ресей үкіметі автомобиль бензинінің экспортына уақытша шектеулерді алып тастады, деп хабарлайды "Адырна" ұлттық порталы РФ Энергетика министрлігіне сілтеп.
Ресей Федерациясының Үкіметі 21 қыркүйекте енгізілген автомобиль бензинін экспорттауға уақытша тыйым салуды алып тастау туралы шешім қабылдады. Оған себеп - 17 қарашадан бастап мотор отынының ішкі нарығындағы баға жағдайын тұрақтандыру жөніндегі шаралар.
Өткен екі айда мұнай өңдеу зауытында мұнайды қайта өңдеудің көлемін сақтай отырып, ішкі нарық қамтамасыз етілген. Нәтижесінде, экспортқа тыйым салынған мерзімнен бері автомобиль бензинінің биржалық көтерме бағасы айтарлықтай төмендеді. Қазір автокөлік бензинінің қоры шамамен 2 миллион тоннаны құрайды.
Уақытша тыйым салуды тоқтатудың тағы бір себебі қыс мезгілінің басталуы болып отыр.
Ресейде отынның биржалық құны көктемде көтеріле бастаған. Автомобиль бензинінің экспортына уақыша тыйым салудан соң 6 қазанда РФ Министрлер Кабинеті қосымша шараларды бекітті.
Сондай-ақ, отын өндірушілер үшін экспортқа тосқауыл баж салығы енгізілді. Үкімет АИ-95 бензинін биржада міндетті сату нормативтерін 15 пайызға, ал дизель отынын 12,5 пайызға дейін көтерді.
