Ауғанстанға барған Қазақстан төтенше жағдайлар министрлігінің күштері мен құралдары елге оралды. Бұл туралы Төтенше жағдайлар министрлігінің баспасөз қызметі жариялады, деп хабарлайды “Адырна” ұлттық порталы.
Гуманитарлық миссияны орындау үшін жалпы 45 адам, оның ішінде ТЖМ Республикалық жедел-құтқару жасағының құтқарушылары, кинологиялық есептоптары, Апаттар медицинасы орталығының дәрігерлері мен фельдшерлері жіберілген болатын.
ТЖМ Азаматтық қорғаныс және әскери бөлімдері комитеті төрағасының міндетін атқарушы генерал-майор Ұларбек Әбікеевтің басшылығымен қазақстандық құтқарушылар жасағы қойылған міндеттерді абыроймен орындады, - деп атап өтті ведомствода.
Құтқарушыларды әуежайда әріптестері, туыстары мен жақындары қарсы алды. Сондай-ақ "Lider.kz" қозғалысының волонтерлері де болды. Олар Чарли, Джейкоб пен Евро атты құтқарушы иттерге медаль дайындады.
