АҚШ-тың Қырғызстандағы елшілігі президент Садыр Жапаровтың жергілікті тәуелсіз БАҚ-ты «Американың қаржыландыруы» туралы айыптауына жауап бере отырып, журналистерге қаржылай қолдау көрсететінін айтты. Дипломатиялық миссияның баспасөз қызметі осыған байланысты мәлімдемені X әлеуметтік желісіндегі парақшасында жариялады, деп хабарлайды "Адырна" ұлттық порталы.
«Журналистика саласындағы көмегіміз фактчекинг бағдарламаларын қаржыландыруға, қырғыз тіліндегі журналистиканы қолдауға және құқық бұзушылықтарды, соның ішінде сыбайлас жемқорлықты ашатын тергеуші журналистерге қолдау көрсетуге бағытталған», – делінген елшілік мәлімдемесінде.
Америкалық дипломаттар сондай-ақ тәуелсіз БАҚ азаматтардың сұраныстарына тиімді жауап беру тұрғысынан билік үшін маңызды екенін атап өтті. Сонымен қатар, елшілік бағдарламалары Қырғызстан үкіметімен ынтымақтастықта жүзеге асырылатыны және әділетті, қауіпсіз әрі гүлденген республиканы қолдауға бағытталғаны айтылды.
21 желтоқсанда үшінші Халық Құрылтайында сөйлеген сөзінде Садыр Жапаров көптеген қырғызстандық тәуелсіз басылымдардың «шетелдік демеушілері» бар екенін айтты. Осы себепті ол БАҚ-ты «сөз бостандығынан айырылған» деп атады, өйткені олар толығымен «иелеріне» бағынады.
«Олар мұнда жалған ақпарат таратып, теріс ақпарат іздейді, басқалардың беделіне нұқсан келтіреді. Ал оларға сотқа шағым түсіргенде, бірден сөз бостандығына қысым жасалды деп айыптайды», – деп атап өтті президент.
Мемлекет басшысы өз сөзін растау үшін деректер келтірді, мысалы, «Клооп Медиа» 2022 жылы АҚШ елшілігінен $25 250 алған.
Президент сондай-ақ АҚШ-тан БАҚ-ты қолдауға қажетті қаражатты Қырғызстан үкіметіне тікелей беруді ұсынды.
«Біз олардың тиімді пайдаланылуын қамтамасыз етеміз. Журналистика деңгейін көтеру керек пе? Біз оны жүзеге асырамыз. Сөз бостандығын толық қамтамасыз еткіңіз келе ме? Біз оны да кепілдендіреміз», – деп сендірді Жапаров.
