Өзбекстан президенті Шавкат Мирзиеев республиканың жаңа шақырылымдағы Олий Мажлис (парламент) Заң шығару палатасының бірінші отырысында сөз сөйлеп, парламенттегі оппозицияны жандандыру керегін айтты. Мирзиеевтің сөзін оның баспасөз хатшысы Шерзод Асадов келтірді, деп хабарлайды “Адырна” ұлттық порталы
Fergana.agency агенттігінің мәліметінше, осыған байланысты президент оппозицияға кепілдік берілген құқықтар санын үштен алтыға дейін ұлғайтуды, сондай-ақ мұндай партиялардың өкілдеріне төменгі палата комитеті төрағасының бір лауазымын және парламент комитеттеріндегі екі депутаттық орынды беруді ұсынған.
Мирзиеев егер салауатты бәсекелестік пен қарама-қайшы пікірлердің күресі сайлаудан заң шығару палатасының қабырғасына көшетін болса, бұл халықтың мүддесі үшін заңдарды әзірлеуге қызмет ететінін атап өтті.
«Өткен сайлауда саяси партиялардың бағдарламалары мен идеялары бір-бірінен ерекшеленіп, әртүрлі саяси идеологиялардың күресі айқын көрінді», - деп қосты республика басшысы.
Мирзиеевтің айтуынша, жаңа дәуірде парламент нағыз халық үйіне, ал оның төменгі палатасы – идеялар генераторына, салауатты бәсекелестік пен пікірталас алаңына айналуы тиіс.
Сондай-ақ Өзбекстан басшысы алдағы заң жобаларының басым бағыттарын атап өтті:
- міндетті медициналық сақтандыру жүйесін нығайту;
- мектеп немесе балабақша салуды жоспарлаған инвесторларды қолдау;
- финтех, стартаптар және франчайзинг үшін құқықтық негіз құру;
- жасанды интеллектті реттеу;
- энергетикалық секторға нарықтық тетіктерді енгізу.
Өзбекстан президентінің Парламенттің төменгі палатасы өткен шақырылыммен салыстырғанда 60%-ға жаңарғанын, 63 депутат қайта сайланғанын, 87-сі жаңадан келгенін баса айтты. Оның 11-і 35 жасқа дейінгі азаматтар. Сонымен қатар, депутаттардың 38%-ын әйелдер құрайды, бұл Орталық Азия елдеріндегі ең жоғары көрсеткіш. Сондай-ақ, тарихта алғаш рет мүмкіндігі шектеулі азамат мандат алды.
Отырыста Заң шығару палатасының спикері бекітілді. Бұл лауазымды 2015 жылдан бері төраға қызметін атқарған Нуриддин (Нурдинжон) Исмоилов қалдырды. Регламентке енгізілген өзгерістерге сәйкес, спикердің жеті орынбасарының орнына екеуі ғана сайланады. Олар Либералдық-демократиялық партияның өкілдері Мавлуда Ходжаев пен Рахимжон Хакимов болды.
Вице-спикерлер өкілеттігі кезеңінде саяси бірлестіктерге мүшелігін тоқтататыны және олардың парламенттегі фракциясының құрамына кіре алмайтыны атап өтілген.
Өткен аптада Өзбекстан Олий Мажлисінің жоғарғы палатасы – Сенаттың құрамы жасақталды. Қазір әр облыс алты емес, төрт адам сайлайтындықтан, сенаторлардың жалпы саны 100-ден 65-ке дейін қысқарды.
Аймақтардан ұсынылған саясаткерлерден басқа тағы тоғызын президент тағайындады. Оның үстіне, олардың алтауы өткен шақырылымдағы Сенатта жұмыс істеген, оның ішінде ең жас сенатор, 30 жастағы Әлішер Садуллаев та бар.
Жалпы, республика Орталық сайлау комиссиясының мәліметі бойынша, парламенттің жоғарғы палатасы мүшелерінің 56,6 пайызы 60 жастан асқан азаматтар, 41,6 пайызы 40 пен 60 жас аралығындағы азаматтар.
Сенатқа дәстүр бойынша Қарақалпақстан Жоқарғы Кеңесінің (Өзбекстан құрамындағы егеменді республика) төрағасы, облыстар мен Ташкент қаласының әкімдері (әкімшілік басшылары) кірді.
