Almatyda "Abaı" metro stanııasynda qaza bolǵan 26 jastaǵy kórý qabileti nashar jigittiń oqıǵasyna qatysty mán-jaı belgili boldy dep habarlaıdy "Adyrna" ulttyq portaly Tengrinews.kz-ke silteme jasap.
Metropolıten basshylyǵynyń málimetinshe, Almaty metrosynyń ár stanııasynda tártip pen jolaýshylardyń, sonyń ishinde múmkindigi shekteýli azamattardyń qaýipsizdik erejelerin saqtaýyn qadaǵalaıtyn qyzmetker kezekshilik etedi.
"10 jeltoqsan kúni kórý qabileti nashar jolaýshy kásiporynnyń vestıbıýlde kezekshilikte turǵan qyzmetkerin aldap, ózin ertip júrgen adam bar ekenin aýyzsha aıtyp, qyzmetkerdiń kómeginen bas tartqan. Keıin beınejazbalardan anyqtalǵandaı, bul adamdar tek kezdeısoq serikter bolǵan jáne olar ony perron-platformaǵa deıin túsirýge kómektesken. Burynǵy kúnderdegi beınejazbalar onyń metrony turaqty paıdalanýshy ekenin jáne árdaıym ertip júretin adamynyń bolatynyn kórsetti", - dep málimdedi metropolıten basshylyǵy.
Osyndaı oqıǵalardyń aldyn alý maqsatynda 11 jeltoqsannan bastap metropolıten qyzmetkeriniń ertip júrýinsiz múmkindigi shekteýli azamattardyń metroǵa kirýine tyıym salyndy. Tipti qasynda ertip júrgen adam bolsa da.
"Osyndaı jaǵdaılardy boldyrmaý úshin metropolıtende platformalyq esikter (screen doors) ornatý máselesi qarastyrylýda. Bul jolaýshylardyń qaýipsizdigin arttyryp, relske qulap ketýdiń nemese relske ruqsatsyz túsý jaǵdaılarynyń aldyn alady. Alaıda bul aıtarlyqtaı qosymsha qarjylandyrýdy qajet etedi – tıisti suranys jiberildi", - dep túsindirdi metropolıten ókilderi.
Sondaı-aq, metropolıtende jolaýshy qaza bolǵannan keıin basshylyq onyń týystarymen dereý baılanysqa shyǵyp, olarǵa qajetti kómek kórsetilgenin atap ótti.
Qazirgi ýaqytta quqyq qorǵaý organdary oqıǵanyń barlyq mán-jaıyn tergep jatyr.
"Biz, óz kezegimizde, ishki qyzmettik tekserý júrgizýdemiz, onyń qorytyndysy boıynsha mindetti túrde tıisti sharalar qabyldaımyz. Bul metro tarıhyndaǵy alǵashqy osyndaı oqıǵa. Sondyqtan bolashaqta mundaı jaǵdaı qaıtalanbas úshin barymyzdy salamyz", - dep qorytyndylady qala metropolıteniniń ókilderi.
Eske sala keteıik, 10 jeltoqsan kúni Almatyda jan túrshigerlik oqıǵa oryn alyp, 26 jastaǵy jigit metronyń astyna túsip, qaza bolǵany týraly jazǵan edik.
