الماتىدا "اباي" مەترو ستانتسياسىندا قازا بولعان 26 جاستاعى كورۋ قابىلەتى ناشار جىگىتتىڭ وقيعاسىنا قاتىستى ءمان-جاي بەلگىلى بولدى دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
مەتروپوليتەن باسشىلىعىنىڭ مالىمەتىنشە، الماتى مەتروسىنىڭ ءار ستانتسياسىندا ءتارتىپ پەن جولاۋشىلاردىڭ، سونىڭ ىشىندە مۇمكىندىگى شەكتەۋلى ازاماتتاردىڭ قاۋىپسىزدىك ەرەجەلەرىن ساقتاۋىن قاداعالايتىن قىزمەتكەر كەزەكشىلىك ەتەدى.
"10 جەلتوقسان كۇنى كورۋ قابىلەتى ناشار جولاۋشى كاسىپورىننىڭ ۆەستيبيۋلدە كەزەكشىلىكتە تۇرعان قىزمەتكەرىن الداپ، ءوزىن ەرتىپ جۇرگەن ادام بار ەكەنىن اۋىزشا ايتىپ، قىزمەتكەردىڭ كومەگىنەن باس تارتقان. كەيىن بەينەجازبالاردان انىقتالعانداي، بۇل ادامدار تەك كەزدەيسوق سەرىكتەر بولعان جانە ولار ونى پەررون-پلاتفورماعا دەيىن تۇسىرۋگە كومەكتەسكەن. بۇرىنعى كۇندەردەگى بەينەجازبالار ونىڭ مەترونى تۇراقتى پايدالانۋشى ەكەنىن جانە ءاردايىم ەرتىپ جۇرەتىن ادامىنىڭ بولاتىنىن كورسەتتى", - دەپ مالىمدەدى مەتروپوليتەن باسشىلىعى.
وسىنداي وقيعالاردىڭ الدىن الۋ ماقساتىندا 11 جەلتوقساننان باستاپ مەتروپوليتەن قىزمەتكەرىنىڭ ەرتىپ ءجۇرۋىنسىز مۇمكىندىگى شەكتەۋلى ازاماتتاردىڭ مەتروعا كىرۋىنە تىيىم سالىندى. ءتىپتى قاسىندا ەرتىپ جۇرگەن ادام بولسا دا.
"وسىنداي جاعدايلاردى بولدىرماۋ ءۇشىن مەتروپوليتەندە پلاتفورمالىق ەسىكتەر (screen doors) ورناتۋ ماسەلەسى قاراستىرىلۋدا. بۇل جولاۋشىلاردىڭ قاۋىپسىزدىگىن ارتتىرىپ، رەلسكە قۇلاپ كەتۋدىڭ نەمەسە رەلسكە رۇقساتسىز ءتۇسۋ جاعدايلارىنىڭ الدىن الادى. الايدا بۇل ايتارلىقتاي قوسىمشا قارجىلاندىرۋدى قاجەت ەتەدى – ءتيىستى سۇرانىس جىبەرىلدى", - دەپ ءتۇسىندىردى مەتروپوليتەن وكىلدەرى.
سونداي-اق، مەتروپوليتەندە جولاۋشى قازا بولعاننان كەيىن باسشىلىق ونىڭ تۋىستارىمەن دەرەۋ بايلانىسقا شىعىپ، ولارعا قاجەتتى كومەك كورسەتىلگەنىن اتاپ ءوتتى.
قازىرگى ۋاقىتتا قۇقىق قورعاۋ ورگاندارى وقيعانىڭ بارلىق ءمان-جايىن تەرگەپ جاتىر.
ء"بىز، ءوز كەزەگىمىزدە، ىشكى قىزمەتتىك تەكسەرۋ جۇرگىزۋدەمىز، ونىڭ قورىتىندىسى بويىنشا مىندەتتى تۇردە ءتيىستى شارالار قابىلدايمىز. بۇل مەترو تاريحىنداعى العاشقى وسىنداي وقيعا. سوندىقتان بولاشاقتا مۇنداي جاعداي قايتالانباس ءۇشىن بارىمىزدى سالامىز", - دەپ قورىتىندىلادى قالا مەتروپوليتەنىنىڭ وكىلدەرى.
ەسكە سالا كەتەيىك، 10 جەلتوقسان كۇنى الماتىدا جان تۇرشىگەرلىك وقيعا ورىن الىپ، 26 جاستاعى جىگىت مەترونىڭ استىنا ءتۇسىپ، قازا بولعانى تۋرالى جازعان ەدىك.
