Aqtóbe oblysynda qashyqtan eki balabaqshada qatar jumys istegen býhgalter jeti jyl ishinde 60 mıllıon teńge jymqyrǵan, dep habarlaıdy "Adyrna" ulttyq portaly.
Muǵaljar aýdanyndaǵy "Gúlder" jáne "Balaýsa" balabaqshalarynda esepshi bolǵan áıel ózi Qandyaǵashta turǵandyqtan, jarty stavkamen qashyqtan júmys istegen. Ol balabaqsha basshylarynyń EP qolyn paıdalanyp, zańsyz túrde óz esepshotyna jalaqy retinde aqsha aýdaryp otyrǵan. Bul uzaq ýaqyt boıy jalǵasyp, tek 2024 jyldyń naýryz aıynda eki balabaqshanyń dırektorlary býhgalterdiń esepterin tekserý týraly aýdandyq bilim bólimine ótinish bildirgen. Sebebi, býhgalter keıbir eseptik qujattardy usynbaǵan.
Jazda júrgizilgen memlekettik aýdıt býhgalterdiń "Balaýsa" balabaqshasynan 30 mıllıon teńge, "Gúlder" balabaqshasynan 29 mıllıon 700 myń teńge jymqyrǵanyn anyqtady.
Aıyptalýshy 60 mıllıon teńge urlaǵanyn tolyq moıyndady. Ol shyǵyndy bólip óteýge ýáde berip, jazasyn keıinge qaldyrýdy jáne túrmege qamamaýdy suraǵan. Sebebi 12 jasar qyzy bar jáne júkti eken.
Júkti bolǵany jazasyn keıinge qaldyrýǵa sebep bolmady. Muǵaljar aýdanynyń soty ony jeti jylǵa bas bostandyǵynan aıyrdy. Ol sot zalynda dereý qamaýǵa alyndy. Sot oǵan 60 mıllıon 154 myń teńgeni bilim basqarmasyna ótemaqy retinde tóleýdi mindettedi. Sondaı-aq, ol memleketke shamamen eki mıllıon teńge memlekettik baj salyǵyn tóleýi qajet. Onyń balasynyń taǵdyry boıynsha sheshimdi qamqorshylyq organdary qabyldaıdy. Sot úkimi áli zańdy kúshine engen joq.
