اقتوبە وبلىسىندا قاشىقتان ەكى بالاباقشادا قاتار جۇمىس ىستەگەن بۋحگالتەر جەتى جىل ىشىندە 60 ميلليون تەڭگە جىمقىرعان، دەپ حابارلايدى "ادىرنا" ۇلتتىق پورتالى.
مۇعالجار اۋدانىنداعى "گۇلدەر" جانە "بالاۋسا" بالاباقشالارىندا ەسەپشى بولعان ايەل ءوزى قاندىاعاشتا تۇرعاندىقتان، جارتى ستاۆكامەن قاشىقتان ءجۇمىس ىستەگەن. ول بالاباقشا باسشىلارىنىڭ ەتسپ قولىن پايدالانىپ، زاڭسىز تۇردە ءوز ەسەپشوتىنا جالاقى رەتىندە اقشا اۋدارىپ وتىرعان. بۇل ۇزاق ۋاقىت بويى جالعاسىپ، تەك 2024 جىلدىڭ ناۋرىز ايىندا ەكى بالاباقشانىڭ ديرەكتورلارى بۋحگالتەردىڭ ەسەپتەرىن تەكسەرۋ تۋرالى اۋداندىق ءبىلىم بولىمىنە ءوتىنىش بىلدىرگەن. سەبەبى، بۋحگالتەر كەيبىر ەسەپتىك قۇجاتتاردى ۇسىنباعان.
جازدا جۇرگىزىلگەن مەملەكەتتىك اۋديت بۋحگالتەردىڭ "بالاۋسا" بالاباقشاسىنان 30 ميلليون تەڭگە، "گۇلدەر" بالاباقشاسىنان 29 ميلليون 700 مىڭ تەڭگە جىمقىرعانىن انىقتادى.
ايىپتالۋشى 60 ميلليون تەڭگە ۇرلاعانىن تولىق مويىندادى. ول شىعىندى ءبولىپ وتەۋگە ۋادە بەرىپ، جازاسىن كەيىنگە قالدىرۋدى جانە تۇرمەگە قاماماۋدى سۇراعان. سەبەبى 12 جاسار قىزى بار جانە جۇكتى ەكەن.
جۇكتى بولعانى جازاسىن كەيىنگە قالدىرۋعا سەبەپ بولمادى. مۇعالجار اۋدانىنىڭ سوتى ونى جەتى جىلعا باس بوستاندىعىنان ايىردى. ول سوت زالىندا دەرەۋ قاماۋعا الىندى. سوت وعان 60 ميلليون 154 مىڭ تەڭگەنى ءبىلىم باسقارماسىنا وتەماقى رەتىندە تولەۋدى مىندەتتەدى. سونداي-اق، ول مەملەكەتكە شامامەن ەكى ميلليون تەڭگە مەملەكەتتىك باج سالىعىن تولەۋى قاجەت. ونىڭ بالاسىنىڭ تاعدىرى بويىنشا شەشىمدى قامقورشىلىق ورگاندارى قابىلدايدى. سوت ۇكىمى ءالى زاڭدى كۇشىنە ەنگەن جوق.
