24-30 qarashasy aralyǵynda Almaty XVII Halyqaralyq «Eýrazııa» kınofestıvaliniń ortalyǵyna aınalady. Bıylǵy festıval qazaqstandyq kınonyń aıtýly mereıtoılarymen erekshelenedi. Qazaq kınosynyń jaryq juldyzy Sháken Aımanovtyń 110 jyldyq mereıtoıy, sondaı-aq «Qazaqfılm» ulttyq kınostýdııasynyń 90 jyldyǵy jáne kınostýdııaǵa Aımanov esiminiń berilgenine 40 jyl toldy.
«Bul jyl biz úshin erekshe mańyzǵa ıe. «Eýrazııa» kınofestıvali uzaq úzilisten keıin qaıta jandanyp, jańa beleske qadam basyp otyr. Sonymen qatar, biz bıyl Sháken Aımanovtyń mádenı murasyn dáriptep, qazaq kınosynyń baılyǵyn álemge tanytýdy kózdeımiz. Onyń fılmderi kóptegen býyndarǵa shabyt berdi. «Qazaqfılm» kınostýdııasynyń qaıta jańǵyrýy da osyny aıqyndaı túsedi», – dedi Sháken Aımanov atyndaǵy «Qazaqfılm» kınostýdııasy prezıdentiniń mindetin atqarýshy, festıval dırektory Aıdar Omarov.
Festıvaldiń eń basty sharalaranyń biri – Sháken Aımanovtyń 1964 jyly túsirilgen «Aldar kóse» fılminiń restavraııalanǵan nusqasy kórsetiledi. Bul týyndy ulttyq mádenıetke degen qurmettiń erekshe belgisi retinde usynylady. Festıvaldiń baǵdarlamalyq dırektory Dıana Áshimova kartınanyń restavraııalanǵan nusqasyn kórermen nazaryna usyný arqyly qazaq kınematografııasynyń baılyǵyn jańa sapada kórsetýdi maqsat etkenin jetkizdi.
Dástúrli festıvaldiń negizin qalaýshy jáne uıymdastyrýshy – QR Mádenıet jáne aqparat mınıstrligi. Aıta keteıik, is-sharanyń basty seriktesi Bazis-A halyqaralyq qurylys kompanııasy. Sondaı-aq, KAZ Minerals ken óndirý kompanııasy, Eurasian Resources Group (ERG), Sarens Kazakhstan, Salem Entertainment, Kinopark Theatres kınoteatrlar jelisi jáne Astana Motors demeýshilik etti.
Festıval baǵdarlamsynda halyqaralyq baıqaý, Ortalyq Azııa men túrki álemi elderiniń fılmder baıqaýy ótedi. Sonymen qatar iskerlik alańdardyń jumysy da qyza túspek.
«Festıval tek baıqaýlyq kórsetilimdermen shektelmeıdi. Baıqaýdan tys baǵdarlamalar, sheberlik sabaqtary, premeralar jáne kınoındýstrııa mamandary úshin erekshe tájirıbe men bilim almasý múmkindigin beretin iskerlik alańdar uıymdastyrylady. Barlyq is-sharalar Almatynyń zamanaýı kınoteatrlarynyń biri – Kinopark 11 IMAX Esentai-de ótedi, al iskerlik kezdesýler Temirbek Júrgenov atyndaǵy Qazaq ulttyq óner akademııasynda ótkiziledi», – dep atap ótti kınofestıvaldiń iskerlik alańynyń jetekshisi Kárim Qadyrbaev.
