Reseı Qazaqstan arqyly Qytaıǵa gaz jetkizýdiń jańa baǵytyn qarastyryp jatyr. Bul týraly premer-mınıstrdiń orynbasary Aleksandr Novak aıtty, dep habarlaıdy «Adyrna» tilshisi «Kommersant»-qa silteme jasap.
«Ázirshe biz bul ıdeıany tek talqylanyp jatyrmyz»,—dedi ol.
Sheneýnik joba iske assa, gaz qubyrynyń qýaty jylyna 35 mıllıard tekshe metrge deıin jetýi múmkin ekenin atap ótti.
Basylymnyń jazýynsha, Reseı Qazaqstan arqyly gaz qubyryn salýdyń birneshe nusqasyn qarastyryp jatyr.
«Alǵashqysy — 2016 jyly keıinge shegerilgen «Altaı» jobasyn jandandyrý. Buǵan deıin ol Qytaıdyń batysyna Reseı gazyn jetkizýdiń negizgi baǵyty bolyp sanalǵan edi. Bul jaǵdaıda Qazaqstanǵa Pavlodar, Abaı jáne Qaraǵandy oblystaryn gazdandyrý úshin gaz qubyryn salýǵa týra keledi. Ekinshi nusqa – Qorǵas aımaǵyndaǵy Qytaıdyń Batys-Shyǵys gaz qubyry júıesine qosylý arqyly Qazaqstannyń shyǵys oblystary, onyń ishinde Abaı jáne Jetisý oblystary arqyly ótetin kúrdelirek baǵyt. Úshinshisi — «Ortalyq Azııa-Ortalyq» gaz qubyry júıesin keri rejımge kóshirý»,—delingen habarlamada.
Aıta keteıik, búginde reseılik gazdyń negizgi kólemi Qytaıǵa «Sibir kúshi» gaz qubyry arqyly keledi. Jeltoqsan aıynda joba 38 mlrd tekshe metr tolyq qýatqa shyǵýy tıis. Qazirgi tańda Máskeý men Pekın Mońǵolııa arqyly ótetin 50 mıllıard tekshe metr syıymdylyǵy bar osy gaz qubyrynyń ekinshi jelisin qurý týraly kelissózder júrgizip jatyr.
