رەسەي قازاقستان ارقىلى قىتايعا گاز جەتكىزۋدىڭ جاڭا باعىتىن قاراستىرىپ جاتىر. بۇل تۋرالى پرەمەر-ءمينيستردىڭ ورىنباسارى الەكساندر نوۆاك ايتتى، دەپ حابارلايدى «ادىرنا» ءتىلشىسى «كوممەرسانت»-قا سىلتەمە جاساپ.
«ازىرشە ءبىز بۇل يدەيانى تەك تالقىلانىپ جاتىرمىز»،—دەدى ول.
شەنەۋنىك جوبا ىسكە اسسا، گاز قۇبىرىنىڭ قۋاتى جىلىنا 35 ميلليارد تەكشە مەترگە دەيىن جەتۋى مۇمكىن ەكەنىن اتاپ ءوتتى.
باسىلىمنىڭ جازۋىنشا، رەسەي قازاقستان ارقىلى گاز قۇبىرىن سالۋدىڭ بىرنەشە نۇسقاسىن قاراستىرىپ جاتىر.
«العاشقىسى — 2016 جىلى كەيىنگە شەگەرىلگەن «التاي» جوباسىن جانداندىرۋ. بۇعان دەيىن ول قىتايدىڭ باتىسىنا رەسەي گازىن جەتكىزۋدىڭ نەگىزگى باعىتى بولىپ سانالعان ەدى. بۇل جاعدايدا قازاقستانعا پاۆلودار، اباي جانە قاراعاندى وبلىستارىن گازداندىرۋ ءۇشىن گاز قۇبىرىن سالۋعا تۋرا كەلەدى. ەكىنشى نۇسقا – قورعاس ايماعىنداعى قىتايدىڭ باتىس-شىعىس گاز قۇبىرى جۇيەسىنە قوسىلۋ ارقىلى قازاقستاننىڭ شىعىس وبلىستارى، ونىڭ ىشىندە اباي جانە جەتىسۋ وبلىستارى ارقىلى وتەتىن كۇردەلىرەك باعىت. ءۇشىنشىسى — «ورتالىق ازيا-ورتالىق» گاز قۇبىرى جۇيەسىن كەرى رەجيمگە كوشىرۋ»،—دەلىنگەن حابارلامادا.
ايتا كەتەيىك، بۇگىندە رەسەيلىك گازدىڭ نەگىزگى كولەمى قىتايعا «ءسىبىر كۇشى» گاز قۇبىرى ارقىلى كەلەدى. جەلتوقسان ايىندا جوبا 38 ملرد تەكشە مەتر تولىق قۋاتقا شىعۋى ءتيىس. قازىرگى تاڭدا ماسكەۋ مەن پەكين موڭعوليا ارقىلى وتەتىن 50 ميلليارد تەكشە مەتر سىيىمدىلىعى بار وسى گاز قۇبىرىنىڭ ەكىنشى جەلىسىن قۇرۋ تۋرالى كەلىسسوزدەر جۇرگىزىپ جاتىر.
