الەمگە ايگىلى فرانكفۋرت كىتاپ جارمەڭكەسىنىڭ وكىلدەرى الماتىلىق كىتاپحانالارمەن، باسپالارمەن جانە جازۋشىلارمەن ىنتىماقتاستىق ورناتۋعا قىزىعۋشىلىق تانىتتى.
الماتى قالاسىنىڭ اكىمى ەربولات دوساەۆ Frankfurter Buchmesse پرەزيدەنتى جانە اتقارۋشى ديرەكتورى يۋرگەن بووستى قابىلدادى.
كەزدەسۋ بارىسىندا فرانكفۋرت تاراپى الماتىنىڭ كوپۇلتتى قالا رەتىندەگى بىرەگەيلىگىن اتاپ ءوتىپ، ۇزاق مەرزىمدى ارىپتەستىك قارىم-قاتىناس ورناتۋعا نيەت ءبىلدىردى. ءوز كەزەگىندە ەربولات دوساەۆ اكىمدىك تاراپىنان كىتاپحانالاردى جاڭعىرتۋعا جانە زاماناۋي قوعامدىق كەڭىستىكتەر قۇرۋعا ەرەكشە كوڭىل بولىنەتىنىن ايتتى. سونداي-اق الماتى قالاسىنىڭ كىتاپحانالارىندا تابىستى ەنگىزىلگەن يننوۆاتسيالىق جانە كرەاتيۆتى شەشىمدەر تۋرالى باياندادى.
«ەلەكتروندى كىتاپتاردى پايدالانۋ ءۇردىسىنىڭ ارتۋىنا قاراماستان، باسپا كىتاپتارىن وقۋ سەزىمىن، قاعاز بەتتەرىن ۇستاپ كورۋ اسەرىن ەشتەڭە الماستىرا المايتىنىنا سەنىمدىمىن. كىتاپحانالاردىڭ بەلسەندىلىگىنەن ءبىزدىڭ تۇرعىندارىمىزدىڭ كىتاپتى وتە جاقسى كورەتىنىن بايقايمىز، ءبىز بۇل باعىتتا بەلسەندى جۇمىس ىستەپ جاتىرمىز. بۇگىندە قالامىزداعى كىتاپحانالاردىڭ 95%-ى جاڭعىرتىلدى. ءبىز بارلىق اۋداندا زاماناۋي كىتاپحانالار اشىپ، حالىق كوپ جينالاتىن جەرلەردە – ساۋدا جانە ويىن-ساۋىق ورتالىقتارىندا، كوميۋنيتي ورتالىقتارىندا جانە باسقا ورىنداردا اۆتونومدى كىتاپحانالار ورناتىپ جاتىرمىز. سونىمەن قاتار، جازۋشىلار مەن زاماناۋي اۆتورلاردى قولدايمىز»، – دەدى الماتى اكىمى ەربولات دوساەۆ.
فرانكفۋرت كىتاپ جارمەڭكەسىنىڭ پرەزيدەنتى جانە اتقارۋشى ديرەكتورى يۋرگەن بووس الماتىدا جەرگىلىكتى اۆتورلار مەن باسپالارعا ارنالعان سەمينارلار وتكىزۋگە، سونداي-اق اۋقىمدى كىتاپ ءىس-شارالارىن ۇيىمداستىرۋدا كەڭەس بەرۋگە دايىن ەكەنىن ءبىلدىردى.
«ءبىز قازاقستانعا ارنايى كەلدىك. الماتىمەن بايلانىس جاساپ، ىنتىماقتاستىق ورناتۋ ءبىز ءۇشىن ماڭىزدى. ءبىز تەك جارمەڭكەلەر وتكىزۋمەن شەكتەلمەي، باسپا ءىسىن دە دامىتامىز. مەن باسپا سالاسى ۇلكەن وزگەرىستەردى قاجەت ەتەدى دەپ سانايمىن جانە وسى سالادا تاجىريبە الماسۋعا دايىنبىز. بۇعان دەيىن ءبىز مەكسيكادا، وڭتۇستىك افريكا رەسپۋبليكاسىندا جانە ءباا-دە وتكەن كىتاپ جارمەڭكەلەرىنىڭ ۇيىمداستىرۋشىلارىن كەڭەس بەرىپ قولدادىق. ياعني، بۇل سالادا مول تاجىريبەمىز بار. سونداي-اق، قازاقستاندى فرانكفۋرت كىتاپ جارمەڭكەسىنىڭ قۇرمەتتى قوناعى بولۋعا شاقىرعىمىز كەلەدى»، – دەدى يۋرگەن بووس.
كەزدەسۋ سوڭىندا تاراپتار 2025 جىلى الماتىدا بىرلەسكەن جوبالاردى دامىتۋ جانە مادەني-ىسكەرلىك بايلانىستاردى نىعايتۋ تۋرالى ۋاعدالاستى.
