مەملەكەتتىك كەڭەسشى ەرلان قارين «Qazaqstan» ۇلتتىق ارناسىنا بەرگەن سۇقباتىندا ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ جۇمىسىنا توقتالدى، دەپ حابارلايدى «ادىرنا» ءتىلشىسى.
«مەملەكەتتىك كوميسسيا وتكەن جىلدىڭ جەلتوقسان ايىندا ءوز جۇمىسىن اياقتادى. ناتيجەسىندە 600 مىڭ ءىس قۇپياسىزداندىرىلىپ، پرەزيدەنت ءارحيۆىنىڭ جانىنان قۇرىلعان حح ساياسي رەپرەسسيالاردىڭ ماتەريالدارىن زەرتتەۋ ورتالىعىنا تاپسىرىلدى. ءبىر ءىس كەم دەگەندە 50-60 تومنان تۇراتىنىن اتاپ ءوتۋ كەرەك. ءبىز ءبىر عاسىردا جينالعان ماتەريالداردى ءدال سول كولەمدە 3 جىل ىشىندە تاپسىردىق. قازىرگى تاڭدا ولاردى زالالسىزداندىرۋ جۇمىستارى جۇرگىزىلىپ جاتىر. كوميسسيا جۇمىسىنىڭ ناتيجەسىندە 300 مىڭعا جۋىق ادام اقتالدى. ولار كەزىندە ءتۇرلى سەبەپپەن قۋدالانعان بولاتىن. ەسەپتەيتىن بولساق، جالپى سانى 2 ميلليون بولاتىن قۇجات جيناقتالدى»،—دەدى ول.
ايتا كەتەيىك، مەملەكەتتىك كوميسسيا قۇرامىندا 425 عالىم مەن زەرتتەۋشى، ونىڭ ىشىندە 260-تان اسا مامان ايماقتىق كوميسسيادا ەڭبەك ەتتى.
