1929 جىلى 3 قىركۇيەكتە ادەبي سىنشى شەريازدان ەلەۋكەنوۆ دۇنيەگە كەلگەن، دەپ حابارلايدى "ادىرنا" ۇلتتىق پورتالى.
بيىل - فيلولوگيا عىلىمدارىنىڭ دوكتورى، پروفەسسور عالىمنىڭ 95 جىلدىعى.
مەملەكەتتىك سىيلىقتىڭ لاۋرەاتى شەريازدان ەلەۋكەنوۆ ءبىر كەزدەگى كيروۆ اتىنداعى قازاق مەملەكەتتىك ۋنيۆەرسيتەتىن 1951 جىلى تامامداعان.
ادەبي قىزمەتكەر «التاي بولشەۆيگى» («رۋدنىي التاي»), «كوممۋنيزم تۋى» (قازىرگى «ديدار») گازەتتەرى ءبولىمىنىڭ مەڭگەرۋشىسى، كەيىننەن اباي اتىنداعى قازمۋ-دىڭ اعا وقىتۋشىسى، نۇسقاۋشى، سەكتور مەڭگەرۋشىسى، قازاقستان كپ وك اپپارات ءبولىمى مەڭگەرۋشىسىنىڭ ورىنباسارى، 1971-1986 جج. - مەملەكەتتىك باسپا كوميتەتىنىڭ توراعاسى بولىپ قىزمەت اتقارعان.
1986-1988 جج. – ورىس ادەبيەتى ءبولىمىنىڭ ديرەكتورى، 1988-1996 جج. – مەڭگەرۋشىسى، م. و. اۋەزوۆ اتىنداعى ادەبيەت جانە ونەر ينستيتۋتىنىڭ اعا عىلىمي قىزمەتكەرى، ءال-فارابي اتىنداعى قازۇۋ جۋرناليستيكا فاكۋلتەتى كىتاپتانۋ كافەدراسىنىڭ پروفەسسورى بولعان.
شەريازدان ەلەۋكەنوۆ جازۋشى، پۋبليتسيست رەتىندە دە بەلگىلى. ونىڭ «ەمتيحان» («ەكزامەن») اتتى ساتيرالىق پەساسى ءوز كەزىندە جامبىل جانە قىزىلوردا وبلىستىق تەاترلارىندا قويىلعان. ال «ات قويۋدىڭ الەگى» سكەتچى «تاماشا» باعدارلاماسىندا كورسەتىلگەن. سونداي-اق، قالامگەر بىرنەشە اڭگىمە، وچەرك، فەلەتون مەن ەسسەنىڭ اۆتورى: «ون ەكى بەت رومان»، «تولىق ادام»، «الاش ازاماتى»، «قانىشتىڭ دومبىراسى»، «جاپونيا: كۇنگەيى مەن تەرىسكەيى».
ادەبيەت مايتالمانى شەريازدان ەلەۋكەنوۆ 2020 جىلى ومىردەن ءوتتى.
