پارلامەنت تۇركىستانعا رۋحاني جانە تاريحي استانا مارتەبەسىن بەرۋ تۋرالى زاڭ جوباسىن قاراۋدا، دەپ حابارلايدى "ادىرنا" ۇلتتىق پورتالى.
تۇركىستان قالاسىنا ەرەكشە مارتەبە بەرۋ تۋرالى زاڭ جوباسى قازاقستان پرەزيدەنتىنىڭ تاپسىرماسى بويىنشا ازىرلەنگەن. بۇل قۇجات تۇركىستاندى رۋحاني جانە تاريحي استانا رەتىندە تانۋعا باعىتتالعان.
ۆيتسە-پرەمەر – ۇلتتىق ەكونوميكا ءمينيسترى نۇرلان بايبازاروۆتىڭ بۇل زاڭ جوباسىن ازىرلەۋدىڭ نەگىزگى سەبەپتەرى رەتىندە تۇركىستان قالاسىنىڭ تۇركى مەملەكەتتەرى ۇيىمى تاراپىنان تۇركى الەمىنىڭ رۋحاني استاناسى رەتىندە تانىلۋىن جانە قالانىڭ تاريحي كەلبەتىن جانە ونىڭ اۋماعىنداعى تاريحي-مادەني مۇرا وبەكتىلەرىن ساقتاۋ قاجەتتىلىگىن ايتتى.
جوبا ازىرلەۋ بارىسىندا انگليا، يتاليا، وزبەكستان جانە ازەربايجان سياقتى ەلدەردىڭ تاريحي ەسكەرتكىشتەردى ساقتاۋ تاجىريبەسى زەرتتەلدى. سونىمەن قاتار، تۇركىستان تۇرعىندارىمەن كەزدەسۋلەر وتكىزىلىپ، ولاردىڭ ۇسىنىستارى زاڭ جوباسىندا ەسكەرىلدى.
زاڭ جوباسى 4 تاراۋ جانە 15 باپتان تۇرادى.
زاڭ جوباسى اياسىندا جەر، ساۋلەت، تاريحي-مادەني مۇرالاردى قورعاۋ، تۋريستىك قىزمەت تۋرالى زاڭدارعا وزگەرىستەر مەن تولىقتىرۋلار ەنگىزۋ كوزدەلگەن. قابىلدانعان جاعدايدا جوبا تەرىس الەۋمەتتىك-ەكونوميكالىق نەمەسە قۇقىقتىق سالدارعا اكەلمەيدى دەپ مالىمدەدى نۇرلان بايبازاروۆ.
