قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ Almaty TV ۇجىمىن تەلەارنانىڭ 25 جىلدىق مەرەيتويىمەن قۇتتىقتادى، دەپ حابارلايدى «ادىرنا» ءتىلشىسى Almaty.tv-گە سىلتەمە جاساپ.
مەملەكەت باسشىسى تىلەك حاتىندا تەلەارنانىڭ شيرەك عاسىر ىشىندە كوپتەگەن بىرەگەي جوبالاردى جۇزەگە اسىرىپ، يگى باستامالار الاڭىنا اينالعانىن اتاپ ءوتتى. Almaty TV ارناسىندا كورەرمەندەردىڭ كوڭىلىنەن شىققان اقپاراتتىق، ساراپتامالىق جانە مادەني-تانىمدىق باعدارلامالار از ەمەس.
«بۇگىندە «Almaty» تەلەارناسى ءوز اۋديتورياسى قالىپتاسقان رەسپۋبليكالىق مەدياقۇرىلىمعا اينالدى. ۇجىم وزىنە جۇكتەلگەن مىندەتتى ابىرويمەن اتقارىپ كەلەدى. سىزدەر الداعى ۋاقىتتا دا ەل مۇددەسى ءۇشىن قىزمەت ەتىپ، تەلەۆيزيا سالاسىن زامان تالابىنا ساي دامىتۋعا ۇلەس قوسا بەرەسىزدەر دەپ سەنەمىن. ۇجىمعا تولاعاي تابىس جانە شىعارماشىلىق شابىت تىلەيمىن»، - دەدى قاسىم-جومارت توقاەۆ.
سونداي-اق تەلەارنا ۇجىمىن سەنات توراعاسى ماۋلەن اشىمباەۆ، ءماجىلىس توراعاسى ەرلان قوشانوۆ، پرەمەر-مينيستر ولجاس بەكتەنوۆ، الماتى قالاسىنىڭ اكىمى ەربولات دوساەۆ، مادەنيەت جانە اقپارات ءمينيسترى ايدا بالاەۆا، تاعى باسقالار قۇتتىقتادى.
سالتاناتتى جيىن بارىسىندا ارنانىڭ بارلىق قىزمەتكەرلەرىنە العىس حاتتار مەن ۆەدومستۆولىق ماراپات تاپسىرىلدى.
1999 جىلى Almaty TV نەگىزى قالاندى. 2022 جىلدىڭ تامىزىنان باستاپ تەلەارنا مەملەكەتتىك مارتەبەگە يە بولدى. سول جىلى Almaty TV تەلەارناسىنا رەبرەندينگ جاسالدى.
سوڭعى ەكى جىلدا تەلەارنا رەيتينگى 70% پايىزعا ءوستى. «K Research Central Asia» مالىمەتتەرى بويىنشا سوڭعى جىلى بىرەگەي كورەرمەن سانى 4,2 ملن بولىپ، مەملەكەتتىك تىلدەگى وزىندىك ءوندىرىس مولشەرى 83% جەتتى.
تەلەارنا ۇجىمى مەرەيلى جىلى الەۋمەتتىك جانە قايىرىمدىلىق باعىتىنداعى 40 شاقتى ءىس-شارا وتكىزۋدى جوسپارلاپ وتىر. مىسالى، جاڭالىقتار ەفيرىندە «25 قايىرىمدى ءىس» ايدارى، ال digital-پلاتفورمادا بالالارعا ارنالعان «ارمانىڭا جەت» اتتى جوبا جارىققا شىقپاق.
