اقمولا وبلىسى قوسشى قالاسىنداعى راحىمجان قوشقارباەۆ اتىنداعى №1 مەكتەپتىڭ تۇلەگى 11 جىل بويى ۇزدىك وقىپ، «التىن بەلگى» يەگەرى اتاندى. تالاپكەر «ادىرنا» تىلشىسىنە بەرگەن سۇقباتىندا مۇنداي جەتىستىككە قاجىرلى ەڭبەك پەن ۇزدىكسىز ىزدەنىستىڭ ارقاسىندا جەتكەنىن ايتتى.
ايىم ەرجانوۆا — بيىلعى ۇبت-دان 140 بالل جيناعان ەكىنشى وقۋشى. ول ءبارى بىردەن بولماعانىن ايتادى.
بيىك مەجەگە جەتۋ ماقساتى
ايىم تەستى تاپسىرعان بءىر ءۇمىت پەن ءبىر كۇدىكتىڭ بولعانىن جاسىرا المادى.
- بۇل مەنىڭ ەكىنشى مۇمكىندىگىم بولدى. العاشقى تەستتى 18 ماۋسىمدا تاپسىرىپ، 136 ۇپاي جينادىم. سول ۋاقىت ارالىعىندا دايىندالىپ، بارلىعىن قايتالاپ شىقتىم. 28 ماۋسىم كۇنى ۇبت-عا قورىقپاي كىردىم. شىنىمدى ايتسام، تەستتى 1 ساعاتتا اياقتاعاندىقتان، وزىمە سەنىمدى بولدىم. الايدا 1-2 سۇراقتان قاتە كەتسە شە دەگەن ۇرەي بولدى. ونى بارلىق ۇبت تاپسىرۋشى تۇسىنەدى دەپ ويلايمىن. سوڭىندا “اياقتاۋ” دەگەن باتىرمانى باسىپ، 140 دەگەن باللدى كورگەندە قۋانىشىمدا شەك بولمادى. الدىما ماقسات ەتىپ قويىپ، وعان بارىمدى سالىپ، وسىنداي بيىك مەجەگە جەتۋ ارقاشان ويىمدا بولدى. ماقساتىما جەتكەنىم ءۇشىن ءوزىمدى كەرەمەت باقىتتى سەزىندىم، - دەيدى ايىم.
ەرتە دايىندىق
جاس تۇلەك ۇلتتىق بىرىڭعاي تەستىلەۋگە 10 سىنىپتان باستاپ دايىندالعان.
- جالپى تاڭداۋ پاندەرىم - دۇنيەجۇزى تاريحى مەن اعىلشىن ءتىلى. «ەكى شەت ءتىلى» ماماندىعىن تاڭداپ وتىرمىن. ازىرگە قاي ۋنيۆەرسيتەتتە وقيتىنىمدى ناقتى ايتا المايمىن. الايدا ءوز ەلىمدە، ياعني قازاقستاندا وقۋىمدى جالعاستىرامىن.ماماندىعىما ءتۇسۋ ءۇشىن قيىن پاندەردىڭ ءبىرى دۇنيەجۇزى تاريحىن وقىپ، بارلىق اقپاراتتى ەستە ساقتاۋ كەرەكتىگىن ءتۇسىنۋ مەنى دايىندىقتى ەرتەرەك باستاۋعا جەتەلەدى. 10 سىنىپتىڭ باسىنان ءوزىم بۇرىننان قاتىسىپ جۇرگەن مەكتەپتەگى ءىس-شارالاردان باس تارتىپ، تەك ۇبت-عا فوكۋس قويدىم. ۇبت بەكىتكەن وقۋلىقتاردىڭ ءار سويلەمىنە نازار اۋدارىپ، ءتۇسىنىپ وقۋ ارقىلىدۇنيەجۇزى تاريحىنان 50/50 مەن قازاقستان تاريحىنان 20/20 ۇپايعا قول جەتكىزدىم، - دەيدى ول.
ۇستازدارعا العىس
دارىندى وقۋشى دايىندىققا وتە كوپ ۋاقىتىن ارناعانىن اتاپ ءوتتى.
- ۇيىقتايتىن ۋاقىتتان باسقا بارلىق كەزدە تەستىلەۋگە دايىندالدىم دەسەم بولادى. ءبىر پاننەن جالىقسام، كەلەسىسىنە ءوتىپ وتىردىم. وسى ورايدا دۇنيەجۇزى تاريحى پانىنەن وففلاين ساباقتاردان بولەك، وقۋشىلارى ءۇشىن قىزىقتى ۆيدەولار ءتۇسىرىپ ءبىزدى 0-دەن باستاپ وقىتقان الىشەر الدوڭعاروۆقا شەكسىز راحمەت ايتقىم كەلەدى. سول بەينەساباقتاردى جاتسام دا، تۇرسام دا، جولدا كەلە جاتسام دا تىڭدايتىنمىن. بۇل ماعان وتە كوپ سەپتىگىن تيگىزدى. سونىمەن قاتار قازاقستان تاريحى پانىنەن ءارتۇرلى ويىندار ويناتىپ، ساباقتى بارىنشا قىزىقتى وتكىزگەن ءبىلىمدى ۇستاز تۇران ساعاداتوۆقا دا كوپ راحمەت! - دەپ العىسىن جەتكىزدى ول.
كەرەك كەڭەس
ايىم ەرجانوۆا ۇبت-نى ەندى تاپسىراتىن تالاپكەرلەرگە ءوز اقىل-كەڭەسىن ايتتى.
- ۇبت-عا دايىندالۋ بارىسىندا جۇيەلى جوسپار قۇرۋعا كەڭەس بەرەمىن. ەڭ الدىمەن، ىشتەي جاقسى نيەت بولىپ، ۇزدىكسىز دايىندالۋ ارقىلى عانا جوعارى ناتيجەگە قول جەتكىزۋگە بولادى دەر ەدىم. ارينە، اراسىندا دەمالۋدى دا ۇمىتپاۋ كەرەك. ۋاقتىلى ۇيىقتاپ، كۇتىنگەن ءجون. اتا-اناما ماعان كورسەتكەن قولداۋى مەن جاساعان جاعدايى ءۇشىن العىسىمدى بىلدىرەمىن. تاعى ءبىر ماعان كومەكتەسكەن زات - دوستارىممەن كەزدەسىپ، بىرگە تاقىرىپتاردى تالداپ، سۇراقتار قويۋ. كەرەمەت ورتا كەرەمەت بولاشاققا جەتەلەيدى. ءبىر-بىرىمىزگە موتيۆاتسيا بەرىپ، لايفحاكتارىمىزبەن ءبولىسىپ، بارلىعى قيىن، كۇردەلى دەپ ويلايتىن دايىندىقتى قىزىقتى ەتىپ ءوتكىزدىك، -دەپ ءسوزىن قورىتىندىلادى جاس تۇلەك.
ايتا كەتەيىك، ۇبت تاپسىرۋعا دايىندالعان ءبىلىم بەرۋ ورتالىعى ايىم ەرجانوۆاعا بەس ميلليون تەڭگە، جاڭا iPhone جانە دۋبايعا ساياحات سىيلادى.
بۇعان دەيىن الماتى وبلىسىنىڭ تۇلەگى جاننۇر ەڭسەبەكتىڭ تەستىلەۋدەن 140 بالل جيناعانىن جازعان ەدىك.
ديانا اسان
«ادىرنا» ۇلتتىق پورتالى
