Бүгін танымал кино және театр актері, Қазақстанның Халық әртісі, «Құрмет», «Парасат» ордендерінің иегері Құман Тастанбековтің туғанына 80 жыл толды, деп хабарлайды «Адырна» тілшісі.
Өнер иесі 1945 жылы Алматы облысының Сарқант ауданында дүниеге келген. 1969 жылы Құрманғазы атындағы қазақ ұлттық консерваторияның театр факультетін бітірген. Ол сахнада О. Бөкейдің «Құлыным меніңдегі» - Жан, «Вьетнам жұлдызындағы» - Ұшқыш, Ә. Нұрпейісовтің «Қан мен терінде» - Тәңірберген, Ғ. Мүсіреповтің «Ақан сері-Ақтоқтысында» - Ақан, С. Мұқановтың «Шоқан Уәлихановындағы» - Шоқан, Т. Ахтановтың «Антында» - Сауран, М. Әуезовтің «Айман-Шолпанында» - Әлібек сынды негізгі рөлдерді сомдады.
Актер кино өнері саласында көрерменге «Қыз Жібек» фильміндегі Төлеген рөлімен танылды. Осы туынды арқылы қазақ кино өнерінің жарық жұлдызына айналған болатын.
Құман Тастанбеков 2017 жылы 72 жасында қайтыс болды.
