Қазақстандық Shoqan School мектебінің үш оқушысы әлемнің ең беделді университеттері – Гарвард пен Калифорния университеті Берклиге (UC Berkeley) оқуға қабылданды, деп хабарлайды “Адырна” ұлттық порталы ҚазТАГ-қа сілтеп.
Сабыржан Арман есімді оқушы Гарвард университетінің компьютерлік инженерия бағдарламасына толық грантпен оқуға түсті. Оспан Томирис – Гарвардтың экономика факультетіне, ал Жанділдаева Камилла – UC Berkeley университетінің Management, Entrepreneurship, and Technology (MET) атты ерекше бағдарламасына қабылданды. Айта кетейік, биыл бұл бағдарламаға 127 мың адам өтініш беріп, тек 200 үміткер ғана іріктеліп алынған. Сондай-ақ, Аружан Асыл Ұлыбританиядағы ең үздік Foundation бағдарламаларының біріне – University College London-ға түсті.
Shoqan School негізін қалаушылар – кәсіпкер Кеңес Рақышев пен эколог Әсел Тасмағамбетова – мектеп оқушыларына жалпы сомасы 173 миллион теңгеден астам стипендия бөлген. Ал әлемнің үздік 10 университетіне түскен түлектердің оқу ақысын өз қалталарынан толықтай өтеуді шешкен.
