Qytaı BRIKS-tiń múshe memleketteri men seriktes elderimen birge ártúrli salalarda praktıkalyq yntymaqtastyqty keńeıtýge daıyn ekenin málimdedi. Bul týraly QHR Syrtqy ister mınıstrliginiń resmı ókili Mao Nın seısenbi kúni aıtty, dep habarlaıdy "Adyrna" ulttyq portaly Sınhýa agenttigine silteme jasap.
Kezekti brıfıngte Mao Nın Reseıdiń dúısenbi kúni 2025 jyldyń 1 qańtarynan bastap BRIKS seriktes elderiniń tizimin jarııalaýyna baılanysty pikir bildirdi.
BRIKS seriktes elderi sanatynyń qurylýy – bıyl qazan aıynda Reseıdiń Qazan qalasynda ótken BRIKS sammıtiniń mańyzdy nátıjeleriniń biri.
Mao Nın sammıtten keıin Indonezııa, Malaızııa, Taıland, Belarýs, Bolıvııa, Kýba, Qazaqstan, Ózbekstan jáne Ýganda BRIKS seriktes elderi retinde anyqtalǵann atap ótti. Onyń aıtýynsha, bul ótken jyly blok quramynyń tarıhı keńeıýinen keıingi mańyzdy ilgerileý.
"BRIKS mehanızminiń ókildigi odan ári keńeıip, onyń tartymdylyǵy men yqpaly aıqyn bola tústi. Bul ony Globaldyq Ońtústik elderiniń yntymaqtastyǵy men birligin nyǵaıtýdaǵy mańyzdy platformaǵa aınaldyrady", – dedi ol.
BRIKS – bul damýshy naryqtary bar ekonomıkalyq áleýeti zor bes iri eldiń ataýlarynyń aǵylshyn tilindegi alǵashqy áripterinen quralǵan qysqartylǵan ataý: Brazılııa, Reseı, Úndistan, Qytaı jáne Ońtústik Afrıka.
Qazaqstan resmı túrde 2025 jyldyń 1 qańtarynan bastap BRIKS-ke seriktes memleket mártebesin alatyny týraly Reseı prezıdentiniń kómekshisi Iýrıı Ýshakov málimdegenin jazǵan edik.
