Tamyz aıynyń basynda Jetisý oblysy Aqsý aýylynyń turǵyny ákim tún jarymda úıime terezeden kirip, zorlyq kórsetpek boldy degen málimdeme jasaǵan edi. 18 qarashada qylmystyq is aýdandyq sotta qaralyp, aıyptalýshy aýyl ákimi men ákimdik qyzmetkerine úkim shyqty, dep habarlaıdy «Adyrna» tilshisi.
Olar turǵyn úıge top bolyp túngi ýaqytta zańsyz kirý jáne eldiń tynyshtyǵyn buzý baby (QK 149-babynyń 2-bóligi) boıynsha aıyptalǵan.
Sotta jınalǵan dálelder, jábirlenýshiniń jáne kýágerlerdiń aıǵaqtary, sondaı-aq istiń basqa da materıaldary negizinde aıyptalýshylardyń kinási dáleldendi.
«Sottalýshylardyń buryn sottalmaǵany jáne kámeletke tolmaǵan balalarynyń bary eskerildi. Olar taǵylǵan aıyptar boıynsha kináli dep tanylyp, árqaısysyna 1 jyl merzimge bas bostandyǵyn shekteý jazasy taǵaıyndaldy. Úkim zańdy kúshine engen joq»,— delingen habarlamada.
Buǵan deıin Aqsý aýyldyq okrýginiń ákimi áıeldiń aıtqanymen múldem kelispeıtinin jetkizgen edi.
