Qarashada Reseı syrtqy ister mınıstri Sergeı Lavrov eldiń Qazaqstanmen ortaq tarıhshylar tobyn quratynyn aıtqan edi. Memlekettik keńesshi Erlan Qarın Ulttyq arnaǵa bergen suhbatynda bul málimdemege qatysty pikir bildirdi, dep habarlaıdy «Adyrna» tilshisi.
Ol birlesken tarıhshylar tobyn qurý týraly kelisim burynnan bar ekenin jetkizdi.
«Bul eshqandaı da jańalyq emes. Buryn da ondaı jumystar atqaryldy, alaıda pandemııa kezinde ýaqytsha toqtatylǵan bolatyn. Bundaı kelisim Reseımen ǵana emes, basqa eldermen de bar. Bylaısha aıtqanda, baıaǵydan qoldanylyp kele jatqan praktıka ǵoı. Bizde tarıhshylardyń túrli assoıaııasy bar. Negizgi maqsat — bir-birimen pikir jáne qujat almasýyna jaǵdaı jasaý. Eýropa elderiniń tarıhshylarymen de jekelegen jumys toptary bar. Bul elimizdiń tarıhyn ózge eldiń ǵalymdary jazady degen sóz emes. Keıbireýler ádeıi arańdatý maqsatynda osyndaı pikir qaldyrady. Biz óz tarıhymyzben ózimiz aınalysyp jatyrmyz, ony ashyq aıtý kerek. Prezıdent tapsyrmasy boıynsha Qazaqstan tarıhynyń 7 tomdyǵy daıyndala bastady. Oǵan 250 otandyq tarıhshy jumyldyryldy. Bıyl ol jumystyń negizgi bóligi aıaqtaldy»,—dedi Qarın.
Eske salaıyq, Astanadaǵy Memlekettik basqarý akademııasynyń Dıplomatııa ınstıtýtynda Sergeı Lavrov Reseıdiń birlesken tarıhshylar tobyn qurýdy kózdep otyrǵanyn jetkizgen bolatyn.
«Reseı men Qazaqstanda bizdiń ortaq tarıhı ótkenimen jáne qazirgi tarıhymen baılanysty taqyryptar perıodty túrde týyndap otyrady. Osy rette, birlesken tarıhshylar tobyn qurý týraly oń kelisimge qol jetkizilgenin atap ótkim keledi», - dedi ol.
Mınıstr mundaı qadamnyń eki elge de paıdaly ekenin jáne qoǵamnyń keı bóliginde paıda bolatyn pikirtalastardy báseńdetýge kómektesetinin málimdedi.
