Shavkat Mırzııoev Palestınadaǵy soǵystan zardap shekken balalar men áıelderge Ózbekstan klınıkalarynda tegin em usynýǵa daıyn ekenin bildirdi. Bul týraly el prezıdenti 11 qarashada Er-Rııadta (Saýd Arabııasy) ótken kezekten tys arab-ıslam sammıtinde málimdedi, dep habarlaıdy "Adyrna" ulttyq portaly fergana.agency-ǵa silteme jasap.
«Áleýmettik ınfraqurylym, mektepter, aýrýhanalar, meshitter, tutas qalalar joıylyp, mıllıondaǵan beıbit turǵyn baspanasynan aıyrylyp, ashtyq pen aýrýdan zardap shegip jatqanyn tynysh qarap otyrý múmkin emes. Eń jamany, biz munyń kýásimiz, bul tragedııaǵa qatysty halyqaralyq arenada qos standarttar qoldanylýda. Bul jaǵdaı shıelenistiń kúsheıýine yqpal etip, halyqaralyq qaýipsizdikke aýyr qaýip tóndiredi», — dedi Ózbekstan prezıdenti.
Mırzııoev qajetti sharalar retinde mynalardy atap ótti:
Birikken Ulttar Uıymy men Qaýipsizdik Keńesiniń arab-ızraıldik qaqtyǵysty sheshýdegi rólin jáne yqpalyn túbegeıli arttyrý kerek. Áskerı qımyldardy dereý toqtatý, qaýipsiz gýmanıtarlyq dálizder qamtamasyz etý jáne beıbit kelissózderdi bastaý máseleleri osy ámbebap halyqaralyq qurylymnyń turaqty nazarynda bolýy tıis;
Memleketter men jetekshi halyqaralyq uıymdardyń Palestına men Lıvanǵa kómek aýqymyn ulǵaıtý kerek, bul «apatty gýmanıtarlyq daǵdarystyń aldyn alý úshin» qajet;
Kelesi jyly Samarqandta ótetin «Parsy shyǵanaǵy arab memleketteri – Ortalyq Azııa» sammıtinde Palestına halqyna praktıkalyq kómek kórsetý máselelerin talqylaý qajet;
Ál-Aqsa meshiti men Ierýsalımniń basqa da erekshe tarıhı-mádenı eskertkishteriniń qol suǵylmaýyn qamtamasyz etý.
Palestına máselesin retteý jáne Lıvandaǵy jaǵdaıdy turaqtandyrý boıynsha sammıtke Arab memleketteri lıgasy men Islam yntymaqtastyq uıymy (IYU) músheleri qatysty. Oǵan Taıaý Shyǵys, Afrıka, Ortalyq jáne Ońtústik Azııa elderiniń 50-den astam memleketter men úkimet basshylary keldi. Mırzııoevpen birge Ortalyq Azııany Tájikstan prezıdenti Emomalı Rahmon, Qyrǵyzstan prezıdenti Sadyr Japarov, Qazaqstannyń syrtqy ister mınıstri Murat Nurtileý ókildik etti.
