شاۆكات ميرزيوەۆ پالەستيناداعى سوعىستان زارداپ شەككەن بالالار مەن ايەلدەرگە وزبەكستان كلينيكالارىندا تەگىن ەم ۇسىنۋعا دايىن ەكەنىن ءبىلدىردى. بۇل تۋرالى ەل پرەزيدەنتى 11 قاراشادا ەر-ريادتا (ساۋد ارابياسى) وتكەن كەزەكتەن تىس اراب-يسلام سامميتىندە مالىمدەدى، دەپ حابارلايدى "ادىرنا" ۇلتتىق پورتالى fergana.agency-عا سىلتەمە جاساپ.
«الەۋمەتتىك ينفراقۇرىلىم، مەكتەپتەر، اۋرۋحانالار، مەشىتتەر، تۇتاس قالالار جويىلىپ، ميلليونداعان بەيبىت تۇرعىن باسپاناسىنان ايىرىلىپ، اشتىق پەن اۋرۋدان زارداپ شەگىپ جاتقانىن تىنىش قاراپ وتىرۋ مۇمكىن ەمەس. ەڭ جامانى، ءبىز مۇنىڭ كۋاسىمىز، بۇل تراگەدياعا قاتىستى حالىقارالىق ارەنادا قوس ستاندارتتار قولدانىلۋدا. بۇل جاعداي شيەلەنىستىڭ كۇشەيۋىنە ىقپال ەتىپ، حالىقارالىق قاۋىپسىزدىككە اۋىر قاۋىپ توندىرەدى»، — دەدى وزبەكستان پرەزيدەنتى.
ميرزيوەۆ قاجەتتى شارالار رەتىندە مىنالاردى اتاپ ءوتتى:
بىرىككەن ۇلتتار ۇيىمى مەن قاۋىپسىزدىك كەڭەسىنىڭ اراب-يزرايلدىك قاقتىعىستى شەشۋدەگى ءرولىن جانە ىقپالىن تۇبەگەيلى ارتتىرۋ كەرەك. اسكەري قيمىلداردى دەرەۋ توقتاتۋ، قاۋىپسىز گۋمانيتارلىق دالىزدەر قامتاماسىز ەتۋ جانە بەيبىت كەلىسسوزدەردى باستاۋ ماسەلەلەرى وسى امبەباپ حالىقارالىق قۇرىلىمنىڭ تۇراقتى نازارىندا بولۋى ءتيىس;
مەملەكەتتەر مەن جەتەكشى حالىقارالىق ۇيىمداردىڭ پالەستينا مەن ليۆانعا كومەك اۋقىمىن ۇلعايتۋ كەرەك، بۇل «اپاتتى گۋمانيتارلىق داعدارىستىڭ الدىن الۋ ءۇشىن» قاجەت;
كەلەسى جىلى سامارقاندتا وتەتىن «پارسى شىعاناعى اراب مەملەكەتتەرى – ورتالىق ازيا» سامميتىندە پالەستينا حالقىنا پراكتيكالىق كومەك كورسەتۋ ماسەلەلەرىن تالقىلاۋ قاجەت;
ءال-اقسا مەشىتى مەن يەرۋساليمنىڭ باسقا دا ەرەكشە تاريحي-مادەني ەسكەرتكىشتەرىنىڭ قول سۇعىلماۋىن قامتاماسىز ەتۋ.
پالەستينا ماسەلەسىن رەتتەۋ جانە ليۆانداعى جاعدايدى تۇراقتاندىرۋ بويىنشا سامميتكە اراب مەملەكەتتەرى ليگاسى مەن يسلام ىنتىماقتاستىق ۇيىمى (يىۇ) مۇشەلەرى قاتىستى. وعان تاياۋ شىعىس، افريكا، ورتالىق جانە وڭتۇستىك ازيا ەلدەرىنىڭ 50-دەن استام مەملەكەتتەر مەن ۇكىمەت باسشىلارى كەلدى. ميرزيوەۆپەن بىرگە ورتالىق ازيانى تاجىكستان پرەزيدەنتى ەمومالي راحمون، قىرعىزستان پرەزيدەنتى سادىر جاپاروۆ، قازاقستاننىڭ سىرتقى ىستەر ءمينيسترى مۇرات نۇرتىلەۋ وكىلدىك ەتتى.
