مارقۇم شەرزات بولاتتىڭ اپكەسى باقىت رەيموۆانىڭ بالاسى مەيىربەك رەيموۆ پرەزيدەنت قاسىم-جومارت توقاەۆتان كومەك سۇرادى، دەپ حابارلايدى «ادىرنا» ءتىلشىسى.
نۇرعانات عايىپباەۆتىڭ جانازاسىنان كەيىن باقىت رەيموۆاعا «ميتينگكە ۇندەگەن» دەگەن ايىپ تاعىلعان بولاتىن. ايەل سوت شەشىمىمەن 15 تاۋلىككە قاماۋعا الىندى، كەيىننەن ەلدەن شىعارىلۋى ءتيىس.
رەيموۆانىڭ ۇلى اناسىنىڭ جالعىز اسىراۋشىسى ەكەنىن ايتىپ، پرەزيدەنتكە ۇندەۋ جولدادى.
«مەنىڭ انامدى سوت 15 تاۋلىككە قاماپ، قازاقستان اۋماعىنان شىعارۋ تۋرالى ۇكىم شىعارعان بولاتىن. انام – مەنىڭ جالعىز اسىراۋشىم. مەن كامەلەت جاسقا تولماعان بالامىن، 11-سىنىپتا وقيمىن. انامنىڭ دا مەنەن باسقا ەشكىمى جوق. مەنى انامنان ايىرماۋلارىڭىزدى سۇرايمىن. ونىڭ قازاقستاننان باسقا بارار جەرى جوق. ءبىز قازاقپىز! ءوزىمنىڭ ەلىم ءۇشىن قىزمەت ەتكىم كەلەدى. ەگەر سوت انامدى قازاقستان اۋماعىنان شىعاراتىن بولسا، مەن ونى بەس جىلعا دەيىن كورە المايمىن. ۇكىمدى ءوزىڭىز قايتا قاراۋىڭىزدى سۇرايمىن»،—دەدى ول.
