قازاقستان پرەزيدەنتى قاسىم-جومارت توقاەۆ پەن گۆينەيا-بيساۋ پرەزيدەنتى ۋمارۋ سيسوكۋ ەمبالو رەسمي كەلىسسوزدەردىڭ قورىتىندىسى بويىنشا باق وكىلدەرىنە ارنالعان بريفينگتە ەكى ەل اراسىنداعى ىنتىماقتاستىقتى نىعايتاتىن باعىتتاردى اتاپ ءوتتى، دەپ حابارلايدى "ادىرنا" ۇلتتىق پورتالى اقوردا ءباسپاسوز قىزمەتىنە سىلتەمە جاساپ.
مەملەكەت باسشىسى گەوگرافيالىق قاشىقتىققا قاراماستان، ەكى ەلدى ورتاق ماقساتتار مەن ۇمتىلىستاردىڭ بىرىكتىرەتىنىن ايتتى.
كەلىسسوزدەر بارىسىندا سەرىكتەستىكتىڭ نەگىزگى باعىتتارى تالقىلاندى. ەرەكشە نازار كولىك-لوگيستيكا سالاسىنا اۋدارىلدى. پرەزيدەنتتەر بيساۋ پورتىن ترانسكاسپي كولىك دالىزىمەن بايلانىستىرۋ مۇمكىندىگىن زەرتتەۋ تۋرالى كەلىسىمگە كەلدى، بۇل ازىق-تۇلىك قاۋىپسىزدىگىن قامتاماسىز ەتۋگە جانە ەكونوميكالىق بايلانىستاردى دامىتۋعا ىقپال ەتۋى مۇمكىن.
قاسىم-جومارت توقاەۆ اۋىل شارۋاشىلىعى سالاسىنداعى ىنتىماقتاستىقتى تەرەڭدەتۋدى ۇسىندى. قازاقستاننىڭ گۆينەيا-بيساۋعا استىق ەكسپورتتاۋ الەۋەتىنىڭ زور ەكەنىن اتاپ ءوتتى. باسقا سالالاردىڭ ىشىندە ول تەمىر، فوسفات جانە سيرەك كەزدەسەتىن مەتالداردى بارلاۋ جانە يگەرۋ بويىنشا تاۋ-كەن ونەركاسىبىندەگى ىنتىماقتاستىقتى اتادى.
قازاقستان پرەزيدەنتى گۆينەيا-بيساۋ دەلەگاتسياسىن استانا حالىقارالىق فورۋمىنا قاتىسۋعا شاقىرىپ، وسى ەلدىڭ جاستارىنا قازاقستاندىق ۋنيۆەرسيتەتتەردە ءبىلىم الۋدى ۇسىندى.
تاراپتار حالىقارالىق ماسەلەلەردى تالقىلاپ، بىرىككەن ۇلتتار ۇيىمى مەن افريكا وداعى اياسىنداعى ءوزارا ءىس-قيمىلدىڭ ماڭىزدىلىعىن توقتالدى.
«ءبىزدى جاھاندىق بەيبىتشىلىك پەن وڭىرلىك تۇراقتىلىقتى قولداۋ بويىنشا ورتاق ۇستانىمىمىز بىرىكتىرەدى. جالپى، جان-جاقتى قارىم-قاتىناستاردى نىعايتۋ ءۇشىن كەڭ مۇمكىندىكتەر بار. بۇگىنگى ماڭىزدى كەلىسىمدەر – سونىڭ ايقىن دالەلى. ۋمارۋ سيسوكۋ ەمبالو مىرزانىڭ ساپارى قازاقستان مەن گۆينەيا-بيساۋ اراسىنداعى ىنتىماقتاستىققا جاڭا سەرپىن بەرەتىنىنە سەنىمدىمىن»، – دەدى توقاەۆ.
ءوز كەزەگىندە گۆينەيا-بيساۋ پرەزيدەنتى ءبىلىم بەرۋ، كومىرسۋتەكتەردى ەكسپورتتاۋ جانە تابيعي رەسۋرستاردى يگەرۋ سالالارىنداعى سەرىكتەستىك الەۋەتىنە توقتالدى.
«قازاقستان مەن گۆينەيا-بيساۋ تابيعي رەسۋرستاردى بارلاۋ، ءبىلىم بەرۋ جانە كومىرسۋتەكتەردى ەكسپورتتاۋ سياقتى سالالاردا ءوزارا ءىس-قيمىلدى جانداندىرۋ ءۇشىن قاجەتتى تەتىكتەرگە يە. سونداي-اق ءبىز ءارتۇرلى حالىقارالىق پلاتفورمالار اياسىنداعى بايلانىستاردى تەرەڭدەتۋگە جانە كوپقىرلى قارىم-قاتىناستارىمىزدى ىلگەرىلەتۋگە مۇددەلىمىز»، – دەدى ۋمارۋ سيسوكۋ ەمبالو.
