تاۋەلسىزدىك مەرەكەسى قارساڭىندا ءبورلى اۋدانىنىڭ قاراشىعاناق جانە ۋسپەن اۋىلدارىنىڭ تۇرعىندارى ورتالىق سۋمەن جابدىقتاۋ جۇيەلەرىن رەكونسترۋكتسيالاۋدىڭ ارقاسىندا ساپالى اۋىز سۋمەن قامتاماسىز ەتىلدى. جۇمىستار 6 ايعا سوزىلدى.
ۋسپەن اۋىلىندا بۇگىندە 300 ادام تۇرادى. اۋىلىنىڭ تۇرعىندارى ورتالىقتاندىرىلعان سۋ قۇبىرىن كوپتەن كۇتتى. سۋ قۇبىرى تارتىلعانعا دەيىن تۇرعىندار اۋىز سۋدى اۋىل كوشەلەرىنىڭ بويىندا ورناتىلعان سۋ باعاندارىنان تاسيتىن. «اۋىل ەل بەسىگى» باعدارلاماسى اياسىندا جۇزەگە اسىرىلعان قايتا قۇرۋ جوباسىنا بارلىق اۋلالاردى ورتالىقتاندىرىلعان سۋ قۇبىرىنا مىندەتتى تۇردە قوسۋ تارماعى ەنگىزىلىپ، تۇرعىندار تازا سۋعا قول جەتكىزدى. سالىنعان جەلىلەردىڭ جالپى ۇزىندىعى 10,2 شاقىرىم، جاڭا مۇنارا مەن رەزەرۆۋارلار ورناتىلدى. قايتا قۇرۋ جۇمىستارىن جۇرگىزگەن مەردىگەر «قالداعايتى» جشس بولدى. شارت بويىنشا جوبانىڭ قۇنى 567,1 ملن تەڭگەنى قۇرادى.
قاراشىعاناق اۋىلى پودستەپنوە-تەرەكتى-رف شەكاراسى تاس جولىنىڭ جانىندا ورنالاسقان. مۇندا 163 ادام تۇرادى. اۋىلدا ەشقاشان ورتالىق سۋمەن جابدىقتاۋ جۇيەسى بولماعان، تۇرعىندار اۋلاداعى قۇدىقتارىن پايدالانىپ كەلدى. مەرەكە قارساڭىندا ءار اۋلاعا ورتالىقتاندىرىلعان سۋ قۇبىرى جەلىلەرىنە قوسىلدى. جالپى ۇزىندىعى 6,3 شاقىرىمدى قۇرايتىن جوبا وبلىستىق جانە اۋداندىق بيۋدجەتتەردەن قارجىلاندىرىلىپ، «ايتەمىر-قۇرىلىس» جشس جۇزەگە اسىردى، قۇنى - 329,5 ملن تەڭگە.
ەكى جوبانىڭ ىسكە اسىرىلۋىن اۆتورلىق قاداعالاۋدى «Stroyconsalting» جشس، تەحنيكالىق قاداعالاۋدى – «اقتاۋسترويەكسپەرت» جشس جۇزەگە اسىردى.
نىسانداردى تاپسىرۋ راسىمىنە ءبورلى اۋدانى اكىمىنىڭ مىندەتىن اتقارۋشى مۇحتار نۇرماقوۆ، وبلىستىق ءماسليحات دەپۋتاتتارى انۋار اگاەۆ، جاستالاپ كۋرمانكۋلوۆ، اۋداندىق ءماسليحات توراعاسى قايرات ەرمەكباەۆ جانە اۋىل تۇرعىندارى قاتىستى.
