الاكول اۋدانى، ءۇشارال قالاسىندا «جانۇيا» وتباسىن قولداۋ ورتالىعى اشىلىپ، پايدالانۋعا بەرىلدى.
ورتالىقتىڭ باستى ماقساتى وتباسى ينستيتۋتىن نىعايتۋ، ءتۇرلى تۇرمىستىق جاعدايلارعا تاپ بولعان جانۇيالارعا قولداۋ كورسەتۋ.
جاڭادان بوي كوتەرگەن ورتالىقتا 15 ادامعا ارنالعان جاتىن ورىن، بالالار ويىن بولمەسى، كىر جۋاتىن ورىن، اسحانا، تىنىعۋ بولمەسى جانە قىزمەتكەرلەرگە ارنالعان ءماجىلىس زالى، الەۋمەتتىك سالا مەن پسيحولوگ ماماندارىنا ارنالعان جەكە بولمەلەر جان-جاقتى زاماناۋي ۇلگىدە جابدىقتالعان. مۇندا 19 مامان تۇراقتى جۇمىس ىستەيدى. الداعى ۋاقىتتا، مەكەمەگە ارنايى قوعامدىق كولىك بەرىلەدى دەپ كۇتىلۋدە. جاڭا مەكەمە تولىقتاي مەملەكەتتەن قارجىلاندىرادى.
مەكەمەدە اتقارىلار جۇمىستاردىڭ بارلىعى وتباسىلارعا كەشەندى كونسۋلتاتسيالىق قىزمەتتەر جانە جانۇيا ينستيتۋتىن نىعايتۋعا ىقپال ەتەدى. انا مەن بالا قۇقىعىن قورعاپ، وتباسىلىق زورلىق-زومبىلىقتى الدىن-الۋ اياسىندا تۇرمىستىق ءتۇرلى جاعدايلارعا تاپ بولعان جانۇيالار مەكەمەگە 1 اي مەن 6 اي كولەمىندە ورنالاسىپ، الەۋمەتتىك-تۇرمىستىق سيپاتتاعى ماسەلەلەرىن شەشىپ، پسيحولوگيالىق، مەديتسينالىق، قۇقىقتىق، الەۋمەتتىك كومەك، جۇمىسقا ورنالاستىرۋ، بەيىمدەۋ جانە وڭالتۋ قىزمەتتەرى كورسەتىلەدى.
ءتىپتى، قىزمەت الۋشىلارعا اەك-گە ءوتىنىم بەرۋ، باسپانا كەزەگىنە تۇرۋ جانە مەديتسينالىق كومەك الۋ بويىنشا كەڭەس الۋ ءۇشىن ارنايى «ەگوۆ» وزىنە-ءوزى قىزمەت كورسەتۋ جانە «ە-ءوتىنىش» اقپاراتتىق جۇيەسى بۇرىشتارى ورنالاستىرىلعان.
بۇگىندە، ومىرلىك قيىن جاعدايعا تاپ بولعان ادامداردى ەرتە انىقتاۋ مەن قولداۋدى ۇيىمداستىرۋ ءۇشىن اۋدان بويىنشا ءموبيلدى توپ قۇرىلىپ، ءوز جۇمىسىن باستاپ تا كەتتى. ءموبيلدى توپ قۇرامىندا قالا، اۋىلدىق وكرۋگ اكىمدەرى، الەۋمەتتىك ماسەلەلەر جونىندەگى قىزمەتكەرلەر، ءبىلىم بەرۋ مەن دەنساۋلىق ساقتاۋ سالالارى جانە ىشكى ىستەر ورگاندارىنىڭ وكىلدەرى قامتىلدى. بۇل ىستە بارلىق سالا ماماندارى بىرلەسىپ جۇمىس ىستەيدى.
