رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ قازاقستان رەسپۋبليكاسىنا ساپارى اياسىندا ونىڭ ماقالاسى ەلىمىزدىڭ بەدەلدى باسىلىمى – «كازاحستانسكايا پراۆدا» گازەتىندە جاريالاندى، دەپ حابارلايدى "ادىرنا" ۇلتتىق پورتالى.
پۋتين ماقالاسىندا رەسەي مەن قازاقستان اراسىنداعى ەكونوميكالىق بايلانىسپەن قاتار، گۋمانيتارلىق بايلانىستاردى دا تىلگە تيەك ەتتى.
"قازاقستاندا لومونوسوۆ اتىنداعى ممۋ سەكىلدى جەتەكشى رەسەيلىك ۋنيۆەرسيتەتتەردىڭ فيليالدارى تابىستى جۇمىس ىستەپ تۇر. جاقىندا استانادا رەسەي سىرتقى ىستەر مينيسترلىگىنىڭ ماسكەۋ مەملەكەتتىك حالىقارالىق قاتىناستار ينستيتۋتىنىڭ (مگيمو) فيليالى دا اشىلماق، ونىڭ تۇلەكتەرى اراسىندا تانىمال قازاقستاندىقتار، سونىڭ ىشىندە قاسىم-جومارت كەمەلۇلى توقاەۆ تا بار. رەسەي قازاقستاندا جاڭا ورىس ءتىلدى مەكتەپتەر سالۋدى جانە مەكتەپتەگى ورىس تىلىندە ءبىلىم بەرۋ ساپاسىن ارتتىرۋدى قولدايدى. جۋىردا قىزىلوردا، تاراز جانە تۇركىستان قالالارىندا تاعى وسىنداي ءۇش مەكتەپتىڭ اشىلۋى كۇتىلۋدە. ارينە، ءبىز قازاقستان رەسپۋبليكاسىنىڭ باسشىلىعىنا، اسىرەسە قاسىم-جومارت كەمەلۇلىنا ورىس تىلىنە ەرەكشە قاراعانى ءۇشىن، ونى مەملەكەتارالىق جانە ۇلتارالىق قاتىناس قۇرالى رەتىندە ىلگەرىلەتۋگە باعىتتالعان حالىقارالىق ورىس ءتىلى ۇيىمىن قۇرۋ تۋرالى ماڭىزدى باستاماسى ءۇشىن العىس بىلدىرەمىز", — دەدى پۋتين.
رەسەي باسشىسى قازاقستان پرەزيدەنتى قاسىم-جومارت توقاەۆپەن ءاردايىم تىعىز بايلانىستا جۇمىس ىستەپ، جاڭا باستامالاردى تالقىلايتىنىن جانە ەكى ەل اراسىنداعى ستراتەگيالىق سەرىكتەستىكتى ودان ءارى دامىتۋعا دايىن ەكەنىن جەتكىزدى.
