2024 جىل 26 قاراشا كۇنى استانادا Maqsut Narikbayev University ءبىلىم الۋشىلارىنا ارنالعان جىل سايىنعى ستۋدەنتتەر قاتارىنا قابىلداۋ ءراسىمى ءوتتى. ءىس-شارا 5000-نان استام قاتىسۋشىنى جيناپ، ۋنيۆەرسيتەت ءۇشىن ماڭىزدى وقيعا بولدى. بۇل كەش جاڭا ستۋدەنتتەردى اكادەميالىق قوعامداستىققا قابىلداۋدىڭ ماڭىزدىلىعىن اتاپ ءوتتى. ءتورت مەكتەپتىڭ ستۋدەنتتەرى — حالىقارالىق ەكونوميكا مەكتەبى، جوعارى قۇقىق مەكتەبى، جوعارى گۋمانيتارلىق مەكتەپ جانە حالىقارالىق جۋرناليستيكا مەكتەبى — ءىس-شارانىڭ باس جۇلدەسى ستۋدەنتتەر قاتارىنا قابىلداۋ كەشىنىڭ كۋبوگى ءۇشىن باق سىناستى.
1995 جىلدان بەرى وتكىزىلىپ كەلە جاتقان ستۋدەنتتەر قاتارىنا قابىلداۋ ءراسىمى جىل سايىن اۋقىمىن كەڭەيتىپ، ۋنيۆەرسيتەت پەن ءبىلىم بەرۋ قاۋىمداستىعى ءۇشىن ماڭىزدى وقيعاعا اينالدى. بيىلعى شارانىڭ باستى يدەياسى قر پرەزيدەنتى قاسىم-جومارت كەمەلۇلى توقاەۆ ۇلتتىق قۇرىلتايدا اتاپ وتكەن قازاقستاندىقتاردىڭ التى نەگىزگى قۇندىلىعىمەن ۇندەستىك تاپتى: تاۋەلسىزدىك پەن وتانشىلدىق، بىرلىك پەن ىنتىماق، ادىلدىك پەن جاۋاپكەرشىلىك، زاڭ مەن ءتارتىپ، ەڭبەكقورلىق پەن كاسىبي بىلىكتىلىك، جاسامپازدىق پەن جاڭاشىلدىق. وسى قۇندىلىقتار جاستاردىڭ ازاماتتىق ۇستانىمىن نىعايتىپ، ەل بولاشاعىنا دەگەن جاۋاپكەرشىلىك سەزىمىن ارتتىرۋدىڭ نەگىزىنە اينالدى.
جەرەبە تارتۋ ارقىلى ءار مەكتەپكە ءوز تاقىرىبى بەكىتىلىپ، ولاردى ءىس-شارا اياسىندا كورنەكى تۇردە تانىستىرۋ مىندەتى جۇكتەلدى. جوعارى گۋمانيتارلىق مەكتەپ «تاۋەلسىزدىك پەن وتانشىلدىق» تاقىرىبىن شەبەر ۇسىنسا، جوعارى قۇقىق مەكتەبى — «بىرلىك پەن ىنتىماق» قۇندىلىقتارىن ايشىقتادى. حالىقارالىق ەكونوميكا مەكتەبى «زاڭ مەن ءتارتىپ» ۇستانىمىن، حالىقارالىق جۋرناليستيكا مەكتەبى «ەڭبەكقورلىق پەن كاسىبي بىلىكتىلىك» قۇندىلىقتارىن ەرەكشە كرەاتيۆپەن جەتكىزدى.
سونداي-اق كەش باعدارلاماسىنىڭ اياسىندا ەرەكشە وقيعا ورىن الدى — قازاقستاننىڭ ەڭ ۇلكەن تۋى اشىلدى. اۋماعى 800 شارشى مەتردى قۇرايتىن، سالماعى شامامەن 60 كيلوگرامم جىبەك تۋ – ەلدىڭ بولاشاعىنا دەگەن اسقاق ارماننىڭ جانە وتانعا دەگەن شەكسىز ماقتانىشتىڭ سيمۆولىن بەينەلەدى.
سالتاناتتى ءراسىم جاقسىلىق ۇشكەمپىروۆ اتىنداعى جەكپە-جەك سارايىندا ءوتتى، وندا ستۋدەنتتەر تەاترلاندىرىلعان قويىلىمدار مەن الەۋمەتتىك جوبالارىن كوپشىلىك نازارىنا ۇسىندى. بارلىق فاكۋلتەتتەر ۇرپاقتان-ۇرپاققا مۇرا بولىپ كەلە جاتقان قۇرمەتتى كۋبوكتى يەلەنۋ جولىندا قىزۋ باسەكەگە ءتۇستى.
بيىلعى جىلى حالىقارالىق ەكونوميكا مەكتەبى لايىقتى جەڭىسىنە قول جەتكىزىپ، قۇرمەتتى ستۋدەنتتەر قاتارىنا قابىلداۋ كۋبوگىنىڭ يەگەرى اتاندى.
بۇل ماڭىزدى شاراعا دايىندىق ءۇش ايعا سوزىلدى. رەپەتيتسيالار، جاتتىعۋلار جانە شىعارماشىلىق جۇمىستار – ستۋدەنتتەردىڭ جوعارى ۇيىمداستىرۋشىلىق قابىلەتىن، ۇيلەسىمدى كوماندالىق رۋحىن جانە شىنايى ىنتاسىن كورسەتكەن تاماشا مۇمكىندىككە اينالدى.
كەشتىڭ باستى حەدلاينەرى تانىمال Irina Kairatovna توبى بولدى. ولاردىڭ ونەرى شاراعا ەرەكشە قۋات پەن پوزيتيۆ سىيلاپ، سالتاناتتى كەشتىڭ جارقىن نۇكتەسىن قويدى.
