وزبەكستاننىڭ سىرتقى ىستەر مينيسترلىگى بىرىككەن اراب امىرلىكتەرىندە راۆۆين تسۆي كوگاننىڭ قازا بولۋىنا بايلانىستى يزرايلگە كوڭىل ايتتى، دەپ حابارلايدى "ادىرنا" ۇلتتىق پورتالى fergana.agency-گە سىلتەمە جاساپ.
بۇل تۋرالى وزبەكستاننىڭ سىرتقى ىستەر ءمينيسترى باحتيور سايدوۆ ءوزىنىڭ Telegram-ارناسىندا حابارلادى.
مينيستر 26 قاراشا كۇنى وزبەكستانداعى يزرايل ەلشىسى گيدەون ليۋستيگپەن كەزدەسۋ وتكىزىپ، كوڭىل ايتۋدى جەكە ءوزى جەتكىزگەنىن مالىمدەدى. سايدوۆتىڭ ايتۋىنشا، وزبەكستان حالقى ءاردايىم ءتۇرلى ءدىن وكىلدەرى مەن ۇلتتارعا دوستىق نيەت تانىتىپ كەلەدى.
ء"بىز ەشقاشان ۇلتشىلدىقتىڭ ەشبىر تۇرىنە توزگەن ەمەسپىز جانە توزبەيمىز. تەرروريزم مەن ەكسترەميزمنىڭ شەكاراسى دا، ۇلتى دا بولمايدى", — دەپ جازدى مينيستر.
سايدوۆتىڭ ايتۋىنشا، وزبەكستان ۇكىمەتى واە جانە يزرايل بيلىگىمەن ءراۆۆيننىڭ ولىمىنە قاتىستى تەرگەۋ جۇمىستارىندا تىعىز بايلانىس ورناتۋدا.
25 قاراشا كۇنى ءباا ىشكى ىستەر مينيسترلىگى بىرنەشە كۇن بۇرىن ۇرلانعان راۆۆين تسۆي كوگاننىڭ دەنەسى تابىلعانىن حابارلادى. جەدەل ارەكەت ەتۋ ناتيجەسىندە قىلمىسقا كۇدىكتى رەتىندە وزبەكستاننىڭ ءۇش ازاماتى ۇستالدى. ولاردىڭ ەكەۋى 28 جاستا، ال بىرەۋى 33 جاستا.
كەيبىر اقپارات قۇرالدارىنىڭ مالىمەتىنشە، كۇدىكتىلەر تۇركياعا قاشىپ كەتۋدى جوسپارلاعان. بىراق قۇقىق قورعاۋ ورگاندارى ولاردىڭ ەلدەن شىعۋىنا جول بەرمەدى. ءباا زاڭدارى بويىنشا مۇنداي قاتىگەز قىلمىس جاساعانى ءۇشىن ءولىم جازاسى قاراستىرىلعان.
