عىلىم جانە جوعارى ءبىلىم ءمينيسترى ساياسات نۇربەك قازاقستان مەن رەسەي عالىمدارى تاريحتى بىرلەسىپ جازادى دەگەن اقپاراتقا بايلانىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى Ulysmedia.kz-كە سىلتەمە جاساپ.
"بىرىنشىدەن، ارنايى كوميسسيا قۇرىلدى دەگەن جالعان اقپارات. ونداي كوميسسيا دا جوق. ۇلتتىق تاريحتى شەتەلدىك مەملەكەتپەن ورتاقتاسىپ جازۋ دەگەن اقپارات جالعان. ءيا، رەسەي جانە قازاقستان تاريحشىلار توبى بار. بىراق ول تازا عىلىمي توپ. ماقساتى – بىلىممەن اينالىسۋ، ارحەولوگيالىق قازبامەن، ەكسپەديتسيالىق جۇمىستارمەن اينالىسۋ. قازىر التاي توڭىرەگىندە بىرلەسكەن ۇلكەن جوبا باستالعان. “ۇلى التاي” دەگەن كونە تۇركى تايپالارعا، قاعاندىقتارعا قاتىستى بىرلەسكەن زەرتتەۋلەر بار. رەسەي تاراپىنان دا كورشىلەس باتىس سىبىردە، التايدا جاڭا ەكسپەديتسيالاردان ارحەولوگيالىق جاقسى جاڭالىقتار شىعىپ جاتىر. سوندىقتان، سولاردىڭ الماسۋ تاقىرىبى بار. بۇل تازا عىلىمي بايلانىس. عىلىممەن، جاڭا ىزدەنىسپەن اينالىسۋ ماقساتىندا قۇرىلعان" - دەدى، ساياسات نۇربەك.
عىلىم جانە جوعارى ءبىلىم ءمينيسترى كەلەسى جىلى رەسەي، يران، قىتاي، ۇلىبريتانيا، اقش، گەرمانيا، تۇركيا عالىمدارىمەن بىرلەسىپ جۇمىس ىستەگەن جەتى تومدىق ۇلكەن حرەستوماتيالىق وقۋلىقتىڭ شىعاتىنى تۋرالى ايتتى. سونداي-اق، بۇل وقۋلىقتىڭ عىلىمي ماقالالاردا، مونوگرافيالاردا قولدانىلاتىنىن دا العا تارتتى.
"جەتى تومدىق جوبا بۇرىن زەرتتەلمەگەن جاڭا فاكتىلەرمەن تولتىرىلادى. سوڭعى 20 جىلدا وتكىزىلگەن جاڭا ارحەولوگيالىق ەكسپەديتسيالار ناتيجەلەرىمەن تولىقتىرىلادى. بىزگە بۇرىن قولجەتىمدى بولماعان جاڭا ارحيۆتەردى اشىپ وتىرمىن. وتە ۇلكەن ءسۇيىنشى: ەكى كۇن بۇرىن ۆاتيكانعا تاريحشى “شىعىستانۋ” ينستيتۋتىنىڭ ديرەكتورى دۇكەن ءماسىمحانۇلىنىڭ جەتەكشىلىگىمەن ءبىزدىڭ ۇلكەن ءبىرىنشى توبىمىز اتتاندى. ۆاتيكان الدىڭعى جىلى قول قويىلعان كەلىسىمشارت نەگىزىندە ۆاتيكاندا بۇرىن جابىلعان ارحيۆ، مۇراجايلارعا تولىققاندى قولجەتىمدىكتى بىزگە بەردى. ءبىزدىڭ ءبىر توپ عالىمدارىمىز شىقتى. وتە جاقسى ناتيجەلەردى كۇتۋدەمىز. ۆاتيكاننىڭ ەلشىلەرى، ميسسيونەرلەرىنىڭ جازعان، جيناعان دەرەككوزدەرى، ەسەپتەرى بىزگە تولىققاندى بەرىلەدى"- دەدى ساياسات نۇربەك.
