مادەنيەت جانە اقپارات ءمينيسترى ايدا بالاەۆا ماجىلىستە "قازاقفيلم" كومپانياسىن مەملەكەت تاراپىنان تىكەلەي قارجىلاندىرۋ ماسەلەسى زاڭنامالىق تۇرعىدان قارالىپ جاتقانىن مالىمدەدى، دەپ حابارلايدى «ادىرنا» ۇلتتىق پورتالى.
مينيستر قازاقفيلمنىڭ جابىلمايتىنىن ايتتى.
«مەن مينيستر رەتىندە مۇنى رەسمي تۇردە جاريالايمىن. بۇل ءبىزدىڭ تاريحىمىز. كينو مەن كينەماتوگرافيانىڭ دامۋى قازاقفيلممەن تىكەلەي بايلانىستى. سوندىقتان ونى ساقتاۋ جانە دامىتۋ – ءبىزدىڭ ۇرپاق رەتىندە مىندەتىمىز»، - دەدى ايدا بالاەۆا.
مادەنيەت مينيسترلىگىنىڭ قازىر قازاقفيلمدى تىكەلەي قارجىلاندىرۋعا قۇقىقتىق نەگىزدەرى جوق. ويتكەنى "قازاقفيلم" ءدال قازىر كينو تۇسىرەتىن بارلىق پروديۋسەرلىك كومپانيالار سياقتى تەڭ قۇقىققا يە.
«ءبىز بۇل ماسەلەنى زاڭنامالىق دەڭگەيدە رەتتەۋ ءۇشىن ناقتى شارالار قابىلداپ جاتىرمىز. ياعني، قازاقفيلمنىڭ تىكەلەي قارجىلاندىرۋ قۇقىعى بولاتىن نورمانى زاڭعا ەنگىزەمىز. قازىر ونىڭ مۇنداي قارجىلاندىرۋعا قۇقىعى جوق. بۇل ۋاقىت ەنشىسىندەگى ماسەلە»، - دەدى مينيستر.
ەسكە سالا كەتەيىك، بۇعان دەيىن شاكەن ايمانوۆ اتىنداعى "قازاقفيلم" كينوستۋدياسىندا 2 قاراشادا كينوگەرلەر مەن كينو ارداگەرلەرى باس قوسىپ، قارا شاڭىراقتاعى ماسەلەنى بيلىككە ەستىرتۋگە تىرىسقان ەدى.
