اقش-تىڭ قازاقستانداعى ەلشىسى دەنيەل روزەنبليۋم ەل تۇرعىندارىنا، جۋرناليستەرگە سۋ تاسقىنىنا قاتىستى ۇندەۋ جاساپ، دۇنيەجۇزىلىك ءباسپاسوز كۇنىمەن قۇتتىقتادى، دەپ حابارلايدى "ادىرنا" ۇلتتىق پورتالى.
«وسى ءباسپاسوز بوستاندىعى كۇنىندە مەن قازاقستاننىڭ بارلىق جۋرناليستەرىنە ەڭبەكتەرىڭىز ءۇشىن العىس ايتامىن، باتىلدىقتارىڭىز ءۇشىن راقمەت جانە قوعامىمىزعا سانالى شەشىم قابىلداۋعا كومەكتەسۋ ءۇشىن ءسوز قۇدىرەتىن پايدالانعاندارىڭىز ءۇشىن العىس ايتامىن» - دەپ جازىلعان ۆيدەودا.
دەنيەل روزەنبليۋم ءوز ۇندەۋىندە 2024 جىلى اتالمىش كۇن جاھاندىق ەكولوگيالىق داعدارىستى كورسەتۋدەگى جۋرناليستيكانىڭ رولىنە ارنالاتىنىن ايتادى.
«قازاقستان ءۇشىن بۇل داعدارىس ەلدىڭ كوپ بولىگىنە اسەر ەتكەن الاپات سۋ تاسقىنى سالدارىنان ءدال قازىرگىدەي جاقىن سەزىلگەن ەمەس. ەلشىلىكتەگى ارىپتەستەرىممەن وسى اپاتتىڭ قۇرباندارىنا، ۇيلەرىنەن، دۇنيە-مۇلكىنەن جانە كاسىبىنەن ايىرىلعان مىڭداعان ادام ءۇشىن قاتتى قايعىرامىز»، - دەدى ەلشى.
ول ەرجۇرەك قۇتقارۋشىلار مەن كورشىلەس ەلدەردىڭ جاناشىرلىعى، وتانداستارىنا ەرىكتى تۇردە كومەك كورسەتكەن سانسىز قازاقستاندىقتاردىڭ ىسىنە قاراپ شابىت العانىن اتاپ ءوتتى.
"جۋرناليستەردىڭ كۇن سايىن ماڭىزدى اقپاراتتى جۇرتشىلىق پەن ۇكىمەتتىڭ نازارىنا جەتكىزە وتىرىپ، ەكولوگيالىق داعدارىستى ەڭسەرۋدە ءرولى وراسان. ولار سىزگە شىندىقتى جەتكىزىپ قانا قويماي، قورشاعان ورتا تۋرالى، سونىمەن قاتار جاڭالىقتار سيۋجەتى مەن ماسەلەنىڭ بارلىق سپەكترى بويىنشا جالعان اقپاراتتىڭ تارالۋىن بولدىرماۋ ءۇشىن ءسوز قۇدىرەتىن پايدالانادى»، - دەپ اتاپ ءوتتى روزەنبليۋم.
ونىڭ ايتۋىنشا، ءسوز قۇدىرەتى قاشان دا قازاقستاننىڭ دالا دەموكراتياسىنىڭ مادەني داستۇرىندە تەرەڭ تامىر جايعان ماڭىزدى بولىگى بولىپ تابىلادى.
"قازاقتىڭ بەلگىلى اتاقتى اقىندارى، شەشەندەرى شەشەندىگىن باسشىلىققا ەلدەستىرۋگە، ماڭىزدى جاڭالىقتى جەتكىزۋگە پايدالاندى. ولار قوعامدا قۇرمەتكە يە بولىپ، ەڭبەكتەرى جوعارى باعالاندى. سول سياقتى ءبىز دە بۇگىندە ءسوز قۇدىرەتىن پايدالانىپ، ءبىزدى حاباردار ەتىپ جانە بىزگە الەمدى اشىپ جۇرگەن جانداردىڭ ەڭبەگىن قۇرمەتتەۋدى جانە باعالاۋدى جالعاستىرۋىمىز كەرەك»، - دەدى اقش-تىڭ قازاقستانداعى ەلشىسى.
