مۇحتار اۋەزوۆ اتىنداعى قازاق ۇلتتىق دراما تەاترىندا «ماحاببات پەن قاسىرەت» قويىلىمىنىڭ پرەمەراسى كورەرمەنگە جول تارتتى، دەپ حابارلايدى "ادىرنا" ۇلتتىق پورتالى.
پرەمەرا 2024 جىلدىڭ 16, 19 ءساۋىر كۇندەرى بولدى. قازاقستاننىڭ ەڭبەك سىڭىرگەن قايراتكەرى، جازۋشى ساۋلە دوسجانوۆانىڭ «قاسىرەت پەن تاعدىر» رومانىنىڭ جەلىسى بويىنشا جازىلعان «ماحاببات پەن قاسىرەت» سپەكتاكلى كوپتىڭ كوڭىلىنەن شىققانداي.
سەبەبى كەيىپكەرلەر اراسىنداعى ماحاببات، سىيلاستىق پەن نازىك سەزىم لەبى ساحنادان سەزىلىپ، كورەرمەن جۇرەگىنە جەتتى. باس كەيىپكەرلەر مەلس پەن اياۋلىم ءبىر-بىرىنە العاش جولىقتىرعان كۇننەن باستاپ عاشىق بولعان. مەلس كوكەيىندەگى كۇدىكتى ويىن، سىمباتتى سۇڭعاق بويىن تۇزەي باستايدى. اياۋلىمدا ءدال سونداي ءتاتتى كۇي كەشەدى. كەيىپكەرلەر سۇيە بىلگەن ادام، سۇيگەنىن سۇيەي دە ءبىلدى. سول ءۇشىن وتقا دا جاناتىنىن، سۋعا دا باتاتىنىن دالەلدەدى.
بىراق ەكى عاشىقتىڭ ەرتەڭگى بولاشاعىنا بۇلىڭعىر بۇعاۋ سالىنادى. قوس عاشىقتىڭ بىرگە بولۋىنا قارسىلىق تانىتقاندار كوپ بولدى. سەبەبى جاس جىگىت مەلس، مەزى ەتكەن تەمىر اربانىڭ تەجەپ ۇستايتىن تۇتقىنى ەدى. ال اياۋلىم بولسا ادەمى، سۇلۋ ءوز ورتاسىنىڭ ءۇمىتتى شام شىراعى بولاتىن.
اۆتور ساۋلە دوسجانوۆانىڭ شىعارماسىن ساحناعا لايىقتاعان نۇسقا اۆتورى – جاقسىلىق مۇراتبەك.
"بىرىنشىدەن، بۇل شىعارما قازاق حالقىنىڭ اۋىر قاسىرەتتى كورسەتەتىن رومان جەلىسىنە اينالعان تۋىندى بولعاندىقتان داۋىرلىك شىعارما. ءبىزدىڭ باسشىمىز بەدەرلەپ، شىعارمانى ساحناعا ماحاببات ارقىلى ارلەۋدى ايتقان. سەبەبى قازىر ادامدار ماحابباتقا ءزارۋ. التى اي ەكى پەسا جازىلدى. بۇل جەردە قازاق جاستارىنىڭ كەڭەس وداعىنىڭ كەزىندەگى ىڭكارلىگى، سەزىمى، ۇياڭدىعى، باتىلدىعى، ءوز سۇيگەن ادامىنا ادالدىعى كەرەمەت بەرىلگەن. ال ءبىز مۇنى ساحنا تورىنە كوتەرگەن كەزدە بۇل شىعارمانىڭ عۇمىرى باياندى بولادى، وقىرمان قاۋىمعا جەتىمدى، ءوتىمدى بولادى دەپ قولعا الدىق. ءساتتى تۋىندى بولدى. كورەرمەننىڭ كوڭىلىنەن شىقتى", - دەدى جازۋشى-دراماتۋرگ جاقسىلىق نۇربولاتۇلى.
پرەمەرا مۇحتار اۋەزوۆ اتىنداعى قازاق ۇلتتىق دراما تەاترىنىڭ كىشى زالىندا ءوتتى. جينالعان قاۋىم ارتىستەرگە تىك تۇرىپ، قول سوعىپ، قۇشاق-قۇشاق گۇل شوقتارىن ۇسىندى.
