Muhtar Áýezov atyndaǵy Qazaq ulttyq drama teatrynda «Mahabbat pen qasiret» qoıylymynyń premerasy kórermenge jol tartty, dep habarlaıdy "Adyrna" ulttyq portaly.
Premera 2024 jyldyń 16, 19 sáýir kúnderi boldy. Qazaqstannyń eńbek sińirgen qaıratkeri, jazýshy Sáýle Dosjanovanyń «Qasiret pen taǵdyr» romanynyń jelisi boıynsha jazylǵan «Mahabbat pen qasiret» spektakli kóptiń kóńilinen shyqqandaı.
Sebebi keıipkerler arasyndaǵy mahabbat, syılastyq pen názik sezim lebi sahnadan sezilip, kórermen júregine jetti. Bas keıipkerler Mels pen Aıaýlym bir-birine alǵash jolyqtyrǵan kúnnen bastap ǵashyq bolǵan. Mels kókeıindegi kúdikti oıyn, symbatty suńǵaq boıyn túzeı bastaıdy. Aıaýlymda dál sondaı tátti kúı keshedi. Keıipkerler súıe bilgen adam, súıgenin súıeı de bildi. Sol úshin otqa da janatynyn, sýǵa da batatynyn dáleldedi.
Biraq eki ǵashyqtyń erteńgi bolashaǵyna bulyńǵyr buǵaý salynady. Qos ǵashyqtyń birge bolýyna qarsylyq tanytqandar kóp boldy. Sebebi jas jigit Mels, mezi etken temir arbanyń tejep ustaıtyn tutqyny edi. Al Aıaýlym bolsa ádemi, sulý óz ortasynyń úmitti sham shyraǵy bolatyn.
Avtor Sáýle Dosjanovanyń shyǵarmasyn sahnaǵa laıyqtaǵan nusqa avtory – Jaqsylyq Muratbek.
"Birinshiden, bul shyǵarma qazaq halqynyń aýyr qasiretti kórsetetin roman jelisine aınalǵan týyndy bolǵandyqtan dáýirlik shyǵarma. Bizdiń basshymyz bederlep, shyǵarmany sahnaǵa mahabbat arqyly árleýdi aıtqan. Sebebi qazir adamdar mahabbatqa zárý. Alty aı eki pesa jazyldy. Bul jerde qazaq jastarynyń Keńes Odaǵynyń kezindegi ińkárligi, sezimi, uıańdyǵy, batyldyǵy, óz súıgen adamyna adaldyǵy keremet berilgen. Al biz muny sahna tórine kótergen kezde bul shyǵarmanyń ǵumyry baıandy bolady, oqyrman qaýymǵa jetimdi, ótimdi bolady dep qolǵa aldyq. Sátti týyndy boldy. Kórermenniń kóńilinen shyqty", - dedi jazýshy-dramatýrg Jaqsylyq Nurbolatuly.
Premera Muhtar Áýezov atyndaǵy Qazaq ulttyq drama teatrynyń kishi zalynda ótti. Jınalǵan qaýym ártisterge tik turyp, qol soǵyp, qushaq-qushaq gúl shoqtaryn usyndy.
