Оңтүстік Кореяның биліктегі "Халық күші" партиясының лидері Хан Дон Хун президент Юн Сок Ёльден әскери жағдай енгізгені үшін отставкаға кетуін талап етті және мемлекеттің басшысы ел үшін үлкен қауіп төндіріп отыр деп мәлімдеді. Бұл туралы 6 желтоқсан күні AFP агенттігі жариялады, деп хабарлайды “Адырна” ұлттық порталы.
Агенттіктің мәліметінше, бұл пікір президенттің импичментіне жеткілікті дауыс жиналуына ықпал ететіні сөзсіз, ал дауыс беру 7 желтоқсанда өтеді.
AFP бұған дейін Хан Дон Хун 5 желтоқсан күні импичментті тоқтата алатынын мәлімдегенін еске салды. Алайда бұл шешіміне мемлекет басшысы өз әрекетінің қателігін мойындаудан бас тартуы себеп болған.
"Жаңа деректерді ескере отырып, менің ойымша, президент Юн Сок Ёльдің қызметінен шұғыл түрде босатылуы қажет, себебі бұл Оңтүстік Корея Республикасын және оның халқын қорғау үшін аса маңызды", – деді партия басшысы.
Ол президенттің әскерилерге қатысты ешқандай шара қолданбағанын атап өтті.
”Олар заңсыз араласқан. Одан бөлек, президент бұл заңсыз әскери жағдайдың қате екенін мойындамайды", – деді Хан Дон Хун.
Оның пікірінше, президент әскери жағдай кезінде контрбарлау бастығына бірнеше негізгі саясаткерлерді "мемлекетке қарсы әрекет ету" айыбы бойынша тұтқындауды бұйырған.
"Осылайша, егер президент Юн президенттік қызметті жалғастырса, елде қазіргі төтенше жағдай сияқты экстремалды әрекеттер қайталануы мүмкін. Бұл Оңтүстік Корея мен оның азаматтарына үлкен қауіп төндіреді", – деп қосты ол.
Оңтүстік Кореядағы ең ірі оппозициялық күш - "Тобуро" демократиялық партиясы 4 желтоқсанда президентті импичментке ұшыратуды жоспарлап отырғанын мәлімдеді. Партия президентке, қорғаныс және ішкі істер министрлеріне, сондай-ақ "әскери жағдайды басқарған және полиция басшылары сияқты негізгі әскери және полиция өкілдеріне" көтеріліс айыбын тағайындайтынын қосты, деп хабарлады AFP агенттігі.
Оған дейін Юн Сок Ёль әскери жағдай режимінің әрекет ету мерзімі аяқталғанын жариялаған болатын, бұл режимді өзі бірнеше сағат бұрын енгізген.
Одан бұрын, ел парламенті - Ұлттық ассамблея әскери жағдай режиміне қарсы шықты. Reuters агенттігінің мәліметінше, 3 желтоқсан кешке, 300 депутаттың 190-ы парламент ғимаратына қоршауды бұзып өтіп, әскери жағдай режимін жоюға дауыс берген.
