Ońtústik Koreıanyń Mýan qalasynda 29 jeltoqsan kúni tańerteń qonýǵa bet alǵan jolaýshylar ushaǵynyń apatqa ushyraýy saldarynan qaza tapqan 179 adamnyń barlyǵynyń denesi tabyldy, dep habarlaıdy "Adyrna" ulttyq portaly Yonhap agenttigine silteme jasap.
"29 jeltoqsan kúni saǵat 21:07-de (Astana ýaqytymen 17:07) Jeju Air áýe kompanııasynyń áýe apaty saldarynan qaza tapqandar sany 179 adamǵa jetti", – delingen ulttyq órt sóndirý qyzmetiniń málimetterine súıengen agenttik habarlamasynda.
Yonhap agenttiginiń málimetinshe, bul áýe apaty Ońtústik Koreıa tarıhyndaǵy eń kóp adam shyǵyny bolǵan oqıǵa bolyp otyr. Ońtústik Koreıa prezıdentiniń mindetin atqarýshy Chhve San Mok 29 jeltoqsannan 4 qańtarǵa deıin jeti kúndik ulttyq aza tutý kúnderin jarııalady.
Ushaq apatynyń sebepteri áli anyq emes, basty boljamdardyń qatarynda qustarmen soqtyǵysý, qozǵaltqysh pen shassıdiń aqaýlary, tejegish júıesiniń isten shyǵýy jáne ushý-qoný jolaǵynyń jetkiliksiz uzyndyǵy atalyp otyr.
Ushaq qonýǵa eki ret áreket jasaǵan. Alǵashqy sátsiz áreketke shassıdiń nemese qozǵaltqyshtyń aqaýy sebep bolýy múmkin. Keıin ushaq korpýsyna qonýǵa tyrysqan. Biraq onyń aldyńǵy bóligi kóterińki qalypta bolyp, ushý-qoný jolaǵynda joǵary jyldamdyqpen qozǵalǵan.
Beınejazbalardan ushaqtyń ushý-qoný jolaǵynda jyldamdyǵyn báseńdete almaǵany jáne onyń aldyńǵy bóligi joǵary qalypta turyp, aqyrynda bógetke soqtyǵysqany kórinedi.
Eske sala keteıik, 29 jeltoqsan kúni Ońtústik Koreıanyń Mýan qalasyndaǵy áýejaıǵa qoný kezinde Bangkok–Muan baǵyty boıynsha ushqan Jeju Air áýe kompanııasynyń Boeing 737-800 ushaǵy apatqa ushyrady. Áýe apaty jergilikti ýaqyt boıynsha tańǵy saǵat 9:07-de oryn aldy. Ushaq ushý-qoný jolaǵynan ótip ketip, qorshaýǵa soǵylyp, órt shyqqan.
Ushaq bortynda 181 adam bolǵan. Olardyń ekeýi aman qaldy – bir áıel jáne bir er adam. Ekeýi de ekıpaj músheleri. Olar ortasha jáne aýyr jaraqat alǵan, qazir aýrýhanaǵa jetkizildi. Ushaq jolaýshylarynyń arasynda qazaqstandyqtar bolmaǵan.
