Azerbaijan Airlines áýe kompanııasynyń ushaǵy apatynan qaza tapqan 21 jolaýshynyń jáne ekıpajdyń úsh múshesiniń máıitteri Bakýge jetkizildi, dep habarlaıdy "Adyrna" ulttyq portaly Minval-ge silteme jasap.
Aqtaý qalasyndaǵy áýe apaty nátıjesinde qaza tapqan qurbandardyń máıitteri Azerbaıjan densaýlyq saqtaý mınıstrliginiń sýdmedekspertıza jáne patologııalyq anatomııa birlestigine tıisti saraptama júrgizý úshin jetkizildi.
Medıa málimetteri boıynsha, Iasamal aýdandyq patologııalyq anatomııa bıýrosynda Azerbaijan Airlines ushaǵynyń apatynda qaza tapqan 13 adamnyń máıitterine qaıta saraptama júrgizilgen.
Sonymen qatar, apat saldarynan qaza tapqan kapıtan Igor Kshnıakınniń máıiti otbasyna sot-medıınalyq saraptama júrgizilgennen keıin tabystalatyny belgili boldy.
Buǵan deıin, ushaq apatynan aman qalǵan 14 jolaýshynyń Ázerbaıjanǵa jetkizilgeni týraly jazǵan edik.
Eske sala keteıik, 25 jeltoqsan kúni AZAL áýe kompanııasynyń Embraer 190 ushaǵy Baký–Groznyı baǵytynda ushyp bara jatyp, Aqtaý áýejaıynan 3 shaqyrym jerde apatqa ushyraǵan edi. Ushaq bortynda 67 adam bolǵan. Onyń 62-si jolaýshy jáne beseýi ekıpaj múshesi. Olardyń 38-i qaza taýyp, 29 adam aýrýhanaǵa jetkizildi. Ushaq ekıpajynan 2 adam tiri qaldy.
