Aqtaý qalasy mańynda bolǵan áýe apatynan keıin jergilikti turǵyndar zardap shekkenderge kómek kórsetý maqsatynda qan tapsyrýda, dep habarlaıdy "Adyrna" ulttyq portaly.
Mańǵystaý oblystyq qan ortalyǵynyń mamandary óńir turǵyndaryn muqtaj jandarǵa qoldaý kórsetýge shaqyrdy.
Sonymen qatar, Astana qalasynda da azamattar qan tapsyrýǵa belsendilik tanytyp, Ázerbaıjan elshiligine gúl shoqtaryn qoıýda.
Aqtaý qalasynda oryn alǵan áýe apatynan keıin qazaqstandyqtar men qutqarýshylardyń kórsetken jedel jáne janashyr áreketteri Ázerbaıjandyq BAQ tarapynan joǵary baǵalandy. Ázerbaıjandyq aqparat quraldary qazaqstandyqtardyń, qutqarýshylar men dárigerlerdiń kásibıligi men adamgershiligine alǵys bildirip, olardyń tragedııaǵa kórsetken reakııasyn erekshe atap ótti.
"Arnaıy nazar aýdarýǵa laıyq nárse – qazaqstandyq qutqarý qyzmetteri men dárigerleriniń joǵary kásibıligi. Barlyq jumystar jedel júrgizilýde. Qazaqstandyqtar jappaı qan tapsyrýda! Olardyń kúsh-jigerine alǵysymyzdy bildiremiz. Rahmet, Qazaqstan!" – dep jazdy belgili ázerbaıjandyq Minval Politika portalynyń jýrnalısteri.
Sonymen qatar, ázerbaıjandyq jýrnalıst jáne bloger Hamıd Hamıdov Qazaqstan azamattaryna, ásirese apattan zardap shekkenderge qan tapsyryp jatqan aqtaýlyqtarǵa alǵys bildirdi.
"Aqtaýlyq baýyrlarym ushaq apatynan aman qalǵandar úshin qan tapsyrý úshin kezekte tur. Sizderge raqmet!" – dep jazdy bloger óziniń Facebook paraqshasynda.
Eske sala keteıńk, búgin Aqtaý mańynda Az Airlines áýe kompanııasyna tıesili jolaýshylar ushaǵy qulady. Qazirgi ýaqytta zardap shekkender men aman qalǵandar anyqtalýda. Prezıdent Qasym-Jomart Toqaevtyń tapsyrmasy boıynsha memlekettik komıssııa qurylyp, jumys atqarýda.
